नेपाली हास्यव्यङ्ग्य अनलाइन पत्रिका

देवीप्रसाद मिश्र :

(वृद्धका सिप र ज्ञानको आदर गरौँ)

शिक्षाका हकमा निरक्षर कुनै पाकाहरू छन् तर ।
छन् सारा इतिहास कण्ठ मनमा देखे-सुनेका भर ॥
छर्दै सत्य कला पलापरिधिका पूर्वार्धको जीवन।
थन्क्याए करले र वृद्ध पथमा हिँड्छन् नथाकीकन ॥१०१॥

उम्दा शिल्प अगाडिका सुजनका हुन् राष्ट्रका यी धन ।
आफ्नै कन्तुरमा रहे सबकुरा, के काम लाग्यो भन ?॥
बग्दो गण्डकझैँ छ वृद्ध कतिको साहित्यमा तिर्सना ।
राख्छन् शब्द सुधामयी रसदिने बन्छन् मिठा सिर्जना ॥१०२॥

हाम्रा यी जननीहरू मुलुकका गर्दै कला सञ्चित।
पस्किन्छन् रस सार लोकलयमा शब्दार्थ आलोकित ॥
मात्रै टिक्टकमा नयाँ परिधिले आस्था जमायो ठुलो ।
कल्ले जोख्छ कला र वृद्धजनका ल्याएर राम्रो तुलो ॥१०३॥

वृद्धावृद्ध निरीह बन्नु नपरोस् यो विश्वले भन्दछ।
पाका सज्जनको समादर गरौँ आस्था अझै बढ्दछ ॥
जानेको जसले छ जे जति कुरा ल्याओैँ यता बाहिर ।
लागौँ लेखक पत्रकार, जति छौँ साहित्यका माहिर ॥१०४॥

पाका मानिसको समस्त सिप यो सद्भावले नाप्नुछ ।
बन्ला यो इतिहास निश्चय भरे तथ्याङ्कमा राख्नुछ ॥
हेरोस् यो सरकारले अझ यता यी शिल्पका चाँङमा
पाऊन् मूल्य समस्त वृद्धजले बेचून् कुनै दाममा ॥१०५॥

(क्रमशः)
०००
२०८०/२/१७