नेपाली हास्यव्यङ्ग्य अनलाइन पत्रिका

के.पी.पौडेल जस्ताघरे :

छन्द : पञ्चचामर–
समग्र बुद्धि रोप्दिने, छ श्रेष्ठ भाव जेष्ठमा।
सहस्र शिल्प भर्दिने, विचार हुन्छ बृद्धमा।।
विकार रोक्न तम्सिने, छ उच्च शक्ति बृद्धमा।
दशा र कष्ट छेक्दिने, विकल्प हुन्छ जेष्ठमा।।-१

छन्द : भुजङ्गप्रयात–
यहाँ बृद्ध बृद्धा, उज्याला भला हुन् ।
कला तेज भर्ने, अनौठा सिरा हुन्।।
सबै बृद्ध बृद्धा, पुजौँ उच्च ठानी ।
सुनौलो र उम्दा, बनोस् जिन्दगानी।। -२

छन्द : शार्दूलविक्रीडित–
पाका मानिस बृद्ध बा हजुरबा, खोज्छन् सहारा लिन।
अाफ्नै प्राण हियो फियो पनि कतै, छोड्लान् कि टेवा दिन ।।
बृद्धा बृद्ध सबै खुबै पिडित छन् , हेरून् तमासा हरि !
सारा सन्तति भावना पर हुँदा, रुन्छन् बिलौना गरी ।।-३

छन्द : स्रग्विणी—
बृद्ध बा मातृका, साथमा बस्छ को ?।
जेष्ठका रुग्णका, वेदना सुन्छ को? ।।
जीर्णका देहका, दुर्दशा मेट्छ क‍ो?।
जेष्ठका त्यागका, शृङ्खला पढ्छ क‍ो?।।-४

छन्द : उपजाति–
छोरा बुहारी , वनिता कता छन् ।
माता पिताका, दुखका कथा छन् ।।
छन् इष्ट साथी, सब छन् धरामा ।
पिता र माता, तर छन् व्यथामा।।- ५

छन्द : मन्दाक्रान्ता—
पाका मान्छे घर मुलुकका, शक्तिका मूल बन्छन् ।
राम्रा उम्दा अनुभवहरू, युक्ति सल्लाह दिन्छन् ।।
अाफ्ना प्यारा जनन सबमा, शिल्पका भाव छर्छन्।
भोको नाङ्गो विवशपनमा, लालका पेट भर्छन्।।-६

छन्द : वसन्ततिलका–
छन् जेष्ठका विगतका, अति नम्य कर्म ।
जोगाउनै कठिन भो, नबुझेर मर्म ।।
बृदा र बृद्ध जनका, शुभ साधना छन् ।
माया दया सुजनता, उपदेश दिन्छन् ।।-७

छन्द : अनुष्टुप्
पुराना सोचले दिन्छन् , आधार ज्ञान शिल्पका।
बुढा पाका खुला हुन्छन्, दया माया विचारका।।
नयाँ हुन्छन् खुबै काँचा, रङ्ग ढङ्ग प्रकारका।
पाकाहरू मियो बन्छन् , देव देवी समानका।।-८

लोक छन्द –
लोकले पुज्ने ईशको रूप देखिन्न खोजेर।
घरका देव पुज्दैनन् मान्छे हिँड्दछन् कुल्चेर।।
गरौँ है माया बाबा र माता माथ हुन् ती हाम्रा ।
आँखाले देख्ने हातले भेट्ने ईश हुन् ती राम्रा ।।-९

०००
बट्टार,नुवाकोट हाल: ,बालाजु, काठमाडौं ।