नेपाली हास्यव्यङ्ग्य अनलाइन पत्रिका

कृष्णप्रसाद गौतम :

१.
हेमन्तको स्याँठ चल्यो शीत लाग्न थाल्यो
तिमी छेउ आएदेखि जाडो भाग्न थाल्यो
गहनाको कुरा ऐले नगरे है प्यारी !
सुनैसुनको देश बन्ने आशा जाग्न थाल्यो ।

२.
मालामाल ठेक्का खुल्यो तँलाई दिलाउनु छ
ठुला स्वर कुर्लनेको मुखै सिलाउनु छ
हात्ती चढी आइज छोरा भरे साँझतिर
मन्त्रीजीका साथ बसी कुरा मिलाउनु छ ।

३.
प्यारो गाउँ छोडी आएँ पसेँ काठमाडौंमा
सुखैसुख भोग्नलाई बसेँ काठमाडौंमा
आशा बग्यो मेलम्ची झैँ पस्यो टोड्काभित्रै
काकाकुल बन्ने कम्मर कसेँ काठमाडौंमा ।

०००
२०८०/०९/१०
इटहरी सुनसरी