नेपाली हास्यव्यङ्ग्य अनलाइन पत्रिका

देवीप्रसाद मिश्र :

बालापन

सललल बग्ने कलकल पानी
मानव चाेला निर्मल ठानी
तुलबुल धेरै नगर न नानी
दिनपल राम्रो साँच जवानी।।४०७।।

बाल्य उमेर सुखकर वेला
छैन अभाव असल छ खेल
युवक छ वेला हाट र मेला
मन बहकाए पर्दछ फेला।।४०८।।

प्रविधि छसँगमा दृश्य नियाल्ने
युवक र युवती रनवन भुल्ने
नगर न यस्तो प्रदुषण जात्रा
विचलन हाेला सुखकर यात्रा।।४०९।।

पठनमा तिम्रो अतिशय खर्च
कठिनले बाबा अविरल छर्छ
नतिजा छ शून्य नम्बर छैन
दाम असुल्ने हविगत छैन।।४१०।।

याम बितेपछि गनगन गर्दा
मार्ग सबैमा लाग्दछ पर्दा
हाय विधाता भन्नु शिवाय
हुन्न थलामा सत्य उपाय।।४११।।

जीवन आफ्नो अलमल बन्ने
साथसखाले असफल गन्ने
याम छँदै अब लक्ष्य समात
कार्य थलामा झुल्छ प्रभात।।४१२।।
( क्रमशः)

०००
२०८०/४/१०