नेपाली हास्यव्यङ्ग्य अनलाइन पत्रिका

देवीप्रसाद मिश्र :

लागाेस् थकान अथवा, तन होस् अशक्त ।
सन्तान खातिर हुनन्, जहिल्यै सशक्त ।।
यस्ता महान् सुजन, आश्रममा नजाऊन् ।
मातापिता निधि दुई, घरमै रमाऊन् ।।१।।

वर्षा र ,ग्रीष्म कति, जीवनमा भगाए ।
हेमन्त वा शिशिरका, कति शीत खाए ।।
सन्तानका प्रगतिकाे, अनुभूति पाऊन् ।
मातापिता निधि दुई, घरमै रमाऊन् ।।२।।

छन् ज्ञानका अनुभवी, अति नै, प्रबुद्ध ।
सान्निध्य बात गरिँदा, दिल हुन्छ शुद्ध ।।
साथै भएर इतिहास,कथा सुनाऊन् ।
मातापिता निधि दुई, घरमै रमाऊन् ।।३।।

संज्ञान जीवन कला, अनमाेल रास ।
बाँड्ने खुलेर जनमा, उपदेश खास ।।
सर्वत्र शान्त गरिमासित,मुस्कुराऊन् ।
मातापिता निधि दुई, घरमै रमाऊन् ।।४।।

छौँ व्यस्त अन्यतिर नै परिवार खास ।
को हेर्छ लौ भन यहाँ सब छन् निराश ।।
सम्पूर्णकाे निकटता नित देख्न पाऊन् ।
मातापिता निधि दुई, घरमै रमाऊन् ।।५।।

खाेज्छाैँ विशेष सँगमा, अधिकार रास ।
कर्तव्य पालन सबैतिर, छैन खास ।।
आनन्दकाे पल सदाशय, देख्न पाऊन् ।
मातापिता निधि दुई, घरमै रमाऊन् ।।६।।

०००
साेह्रखुट्टे, काठमाडाैं