नेपाली हास्यव्यङ्ग्य अनलाइन पत्रिका

रामशरण न्यौपाने पाँचघरे :

माता पिता नै परलोक जाँदा
जम्माभई बन्धु मसान लाँदा
राखेन माया मुटुभित्र कत्ति
फर्केन छोरो दिन दागबत्ती॥१

हेर्ने थियो आस पुता फिरेको
हाँसेर आफ्नै घरमा छिरेको
संस्कारले तान्नसकेन रत्ती
फर्केन छोरो दिन दागबत्ती॥२

माता पिताजीकन धेर पिर्ने
यस्ता हरामीकन चेत फिर्ने
टार्ने यहाँ को छ र यो विपत्ती?
फर्केन छोरो दिन दागबत्ती॥३

देखेर यस्तो मतिभ्रष्ट चाला
रोपेसरी भै मुटुभित्र भाला
भन्छन् सबैले खुद हो असत्ती
फर्केन छोरो दिन दागबत्ती॥४

धेरै यहाँ छन् परदेश जाने
माता पिताको वचनै नखाने
को कस्नसक्ने लिन काबु नत्थी?
फर्केन छोरो दिन दागबत्ती॥५

पैसा कमाए पनि छैन काम
छोरो बनी राख्न भुलेर नाम
किनेन कात्रो पनि त्यो त्रिहत्ती
फर्केन छोरो दिन दागबत्ती॥६

०००
भक्तपुर