गाईजात्रा
दलका थप ताण्डव गाईजात्रा भन्दा सयौं गुणा हास्यपरक र व्यङ्ग्य परक भएकाले वास्तविक चरित्रलाई छाडेर कार्यक्रममा को किन कलाकारलाई हेर्न आउनु र ...!
चूडा निर्भीक :
गाईजात्राको अवसर पारेर गाईजात्रा कार्यक्रम राख्ने निधो एक महिना अगाडि नै हास्यव्यङ्ग्य साहित्य समाजले निर्णय गरेको थियो । कार्यक्रमका लागि टिकट छापियो । विज्ञापन गरियो । विभिन्न काउन्टर राखेर टिकट बिक्री कक्ष राखियो ।
जति प्रचार प्रसार गरे पनि टिकट बिक्री भएन ।
कार्यक्रम सञ्चालन गरिने दिन हल रित्तो देखियो । कार्यक्रम प्रस्तोता समाजका पदाधिकारीहरू र केही नगन्य पाहुनाका साथ कार्यक्रम समापन गरियो ।
कार्यक्रमका दौरानमा कुनै दर्शक दीर्घाका मानिसहरू हाँसेनन् । ताली ठोकेनन् र रमाएनन् ।
कार्यक्रम समापन पश्चात मूल्याङ्कन कार्यक्रम राखियो । कार्यक्रमका विषयवस्तु र प्रस्तुति गत सालका भन्दा उत्कृष्ट र हास्यव्यङ्ग्यपरक भएको ठहर गरियो । साथै एउटा भिन्न तर सबैले महसुस गरिएको रहस्यको पनि रहस्योद्घाटन गरियो ।
सत्ता पक्ष र प्रतिपक्षको जुहारी, विभिन्न समयका फाईल खोल्ने र कारवाही गर्ने सिलसिलामा काम लाए, अह्राएकालाई फसाएर दलका नेता आभा नै रहेका समाचार, संसद गतिविधि र दलका थप ताण्डव गाईजात्रा भन्दा सयौं गुणा हास्यपरक र व्यङ्ग्य परक भएकाले वास्तविक चरित्रलाई छाडेर कार्यक्रममा को किन कलाकारलाई हेर्न आउनु र …!
०००
चन्द्रागिरी, काठमाडौं ।