नेपाली हास्यव्यङ्ग्य अनलाइन पत्रिका

भीम गौतम :

ऊ गफैगफ उरेल्छ
टुक्का हालेर मस्त
हुक्का पिउनेको जस्तो ठट्टा गर्छ
जादु देखाउने झुटा छट्टु जस्तो
बेतालले मादल ठोक्छ खरी नभएको
ऊ नेता
मेरो गाउँदेखि शहरसम्मको ।

संस्कार सम्मान बुझ्दैन
तिरस्कार, घृणा र ठगी किर्तेमा
हिटलर नाँघेर बाजे बन्छ
शिर, शरिरैभरि लिखा जुम्रा बोकेर
पानीनै नभएको बगरमा पुग्छ
सुख्खा बगरमा
भ्रमपूणर् खेती गर्न,
खेताला खोज्दै
निधारैभरि खरानी घस्छ
हो, ऊ नेता
मेरो गाउँदेखि शहरसम्मको ।

थरीथरी स्वर निकाल्दै शङ्ख फुक्छ
अनेकौ टापि मन्त्रले हल्लिँदै घण्टी बजाउँछ
जानाजानी हेर्दाहेर्दै जोगी बन्छ
चरम नाङ्गो बनी खरानी घस्छ
अलाप गर्दै मुखभरि
टुनामुना टुक्का बुन्छ
गुट, झुट, लुट र बुट बजार्दै
समृद्ध खोक्दै विकास भन्छ
ऊ गफै उरेल्छ
हुक्का पिउनेको जस्तो ठट्टा गर्छ
ऊ नेता
मेरो गाउँदेखि शहरसम्मको ।

०००
भरतपुर, चितवन