नेपाली हास्यव्यङ्ग्य अनलाइन पत्रिका

नगिता लेप्चा राई :

भन्नु उसो होइन । गाउँ-घरतिर किसिम-किसिम थरीथरी अनि परीपरीका मानिसहरू हुन्छन् । उनीहरूको स्वाभाव, आनीबानी सरल, शुद्ध, छक्का पञ्जा नजान्ने । गाउँ-घरतिर अर्काको चियोचर्चो गर्ने, यताको कुरा उता लाने, अरुलाई भन्दा ऊ आफूलाई खसखस पर्ने स्वाभावका मानिसहरू देखिन्छन् । हाम्रो गाउँका यस्ता व्यक्तिको सम्झना गरिरहेछु जो आफ्नो मनका आफै धनी हुन् । उनी मनका राजा हुन् । आफ्नो खान्छन्, ब्रिटिश आर्मी, इण्डियन आर्मीको पेन्सन सँगसँगै अहिले एउटा स्थानीय सरकारी ब्याङ्कमा गार्डको काम गरिरहेका छन् । भनूँ दुईवटा दुईवटा सरकारी पेन्सन र वर्तमान नोकरीको पैसा । पैसाले अपुग केही छैन । तर पनि घमण्ड फुर्केपना एउटै छैन ।

मिलनसार स्वाभाव । गाउँ-घरमा कसैलाई पनि दुःख आइपर्दा सबैभन्दा पहिले उनी नै हाजिर हुन्छन् अनि आफूले भ्याएसम्म सघाउँछन् । उनको खास नाम बमबहादुर बर्मेली हो । अङ्ग्रेजी शब्द द्यद्यद्य उच्चारण गर्नुपर्ने हुनाले सजिलोको निम्ति (बी)३ = बी क्यूब बडा भन्यो सकिगो । यसैले गाउँ घरकाहरूले उनलाई (बी)३ = बी क्यूब बडा भन्छन् । (बी)३ = बी क्यूब बडा भनेपछि उनलाई नचिन्ने कोही हुँदैनन् तर बमबहादुर बर्मेली भनेपछि उनलाई कसैले चिन्दैनन्। हुन पनि बमबहादुर बर्मली वा BBB भनिरहनु समय लाग्ने । यसकारण (बी)३ = बी क्यूब बडा नै सजिलो, छिटो पनि मिठो पनि ।

हाम्रा (बी)३ = बी क्यूब बडा मान्छे अति नै फर्साइला छन् । फर्साइला मात्र होइन रौसे पनि । दुई दुइवटा पल्टन लुटिसकेका । त्यो पनि एउटा भारतीय पल्टन अनि अर्को ब्रिटिश पल्टन । अर्थात् यसौ भनुँ, देश खाइ शेष भइसकेका । उनलाई (बी)३ = बी क्यूब बडा भनिदिँदा खुसी हुन्छन्, तर पल्टने बडा भनेको उनी ट्याक्कै सहन चाहँदैनन् । कसैप्रति उनको पाप मन छैन । गाउँ-घरका युवाहरूलाई एकसाथ लिएर हिँड्छन् । तर उनको एउटै दोष के छ भने उनी आफ्नो विज्ञापन गर्न भने उस्ताद छन् । यसैले उनलाई उनको सामु (बी)३ = बी क्यूब बडा भने पनि उनी टाढिएपछि उनलाई मात्रै विज्ञापन बडा वा BB भन्न चुक्दैनन् । तर अधिकाश (बी)३ = बी क्यूब बडा भन्ने नै धेर रुचाउँछन् ।

जे होस्, (बी)३ = बी क्यूब बडाको कुरै ठूलो । शास्त्र, साहित्य, संस्कृति, वेद, उपनिषद्, रामायण महाभारत, विज्ञान, भूगोल सबै नै जान्दछु भनी आफ्नो ज्ञानको विज्ञापन गर्न (बी)३ = बी क्यूब बडालाई कसैले भेट्दैन । हामीलाई शास्त्र, साहित्य, संस्कृति, वेद, उपनिषद्, रामायण महाभारत, विज्ञान, भूगोलबारे केही ज्ञान छैन। तर उनले भनेका कुरा पत्याउनैपर्छ । (बी)३ = बी क्यूब बडा भन्छन्, हावाजहाज र पानीजहाज बाहेक सबै चलाउन सक्छन् । पल्टनमा छँदा हावाजहाज झण्डै झण्डै उडाएका अरे । तर त्यतिबेला (बी)३ = बी क्यूब बडाको श्वास बढेकोले हावाजहाज उडाउन मानेनन् भनी हामीलाई छक्कै पार्छन् ।

कुरैकुरामा एकजनाले सोध्यो, अच्छा (बी)३ = बी क्यूब बडा तपाई कुन कुन गाडी कुदाउनु सक्नुहुन्छ ? (बी)३ = बी क्यूब बडाको उत्तर, ए नाथे जुनै गाडी पनि यूँ हाँकिदिन्छु नि… तर… । तर भनेपछि (बी)३ = बी क्यूब बडा एकक्षण रोकिन्छन् ।
अर्को सोध्छ- तर चैँ के (बी)३ = बी क्यूब बडा ।
(बी)३ = बी क्यूब बडा – तर चैँ अब गाडी म एकदेखि डेढसय किलोमिटर रफ्तारमा यूँ हाँक्छु नि तर मलाई ब्याक गर्नु चाहिँ आउँदैन र म गाडी छुँदै छुन्न । फेरि अर्को प्रश्न- (बी)३ = आम्बो… गाडी जम्मै हाँक्नु सक्नेले ब्याक गर्न चैँ नजानेका ?

गम्भीर जवाब बी क्यूब बडाको- होइन नानी हो… जिन्दगीमा मैले कहिले ब्याक हेरिनँ, हेर्न जानिनँ अनि़ सिकिनँ पनि । दुई दुईवटा पल्टन पचाइसकेको मान्छे म । एउटा इण्डियन आर्मी अर्को ब्रिटिश आर्मी । पल्टनमा मेरा उस्तादहरूले कहिले पनि ब्याक नहेर्ने आदेश दिएका हुनाले मैले जीवनमा ब्याक कहिले हेरिनँ त्यसैले गाडी पनि ब्याक गर्न नसिकेको हुँ । नो ब्याक, नेभर ब्याक. अलवेज फ्रण्ट… स्ट्रेट । बी क्यूब बडाको कुरा के पत्याउनु के नपत्याउनु ? पैसाको अपुग नहुने बी क्यूब बडाले यसैले गाडी नकिनेका होलान् भन्ने हाम्रो मूर्ख सोचाइँ छ ।

बी क्यूब बडा संसारको कुन देश घुमेका छैनन् भनी हामीलाई छक्कै पार्छन् । हामी यही गाउँमा जन्मेर त आजसम्म पनि पल्लो गाउँ राम्ररी चिन्न सकेका छैनौँ । तर बी क्यूब बडाले जम्मै देश घुमिसकेँ भन्दा हामी मान्छे भएर जन्मेकोमा लाज लागेर आउँछ । संसारको सबै देश घुमिसक्ने बी क्यूब बडाको कुरा आश्चर्य लाग्नु स्वाभाविकै हो । मेरो एकजना उपद्री साथीको मुख छिटो, सोधी हाली, अच्छा (बी)३ = बी क्यूब बडा तपाईं भूगोल पनि जानुभएको छ ?

(बी)३ = बी क्यूब बडा जुङ्गा मुसार्दै भन्छन्, भूगोल ? मेरो पल्टन भूगोलमा तीन महिना त्यहीँ बसेरो आएको । कुरा नगर भूगोल देशको । सहै हाँ परेर, हई (बी)३ = बी क्यूब बडा ?
(बी)३ = बी क्यूब बडा – येस… इट वाज भेरी डेन्जरस् प्लेस ।
अर्को फटाहा प्रश्न- भूगोल देश घुम्नुभयो कति भाग्यमानी तपाईं ।
(बी)३ = बी क्यूब बडा – यो मेरो पल्टनको कमाल हो । यसकारण म मेरो पल्टनलाई थाउजेण्ड टाइम्स स्यालुट गर्छु ।

फेरि फटाहा प्रश्न, अच्छा बी क्यूब बडा भूगोल देशमा भ्रमण मात्र होइन, तीन तीन महिनासम्म पनि बिताउनुभएछ । तपाईं कति भाग्यमानी । सबैको भाग्यमा यस्तो जुर्दैन । अनि (बी)३ = बी क्यूब बडा भूगोल गएपछि त अक्षांश र द्राघिमांश देशमा पनि अवश्यै जानुभएको होला हई ?

आफ्नो फिला बजार्दै, ओहो सो सरी… अक्षांश र द्राघिमांश भन्ने देशमा मात्रै जान सकिनँ नि । हाम्रो पल्टन भूगोल देशबाट क्याम्प सरेर अक्षाँश र द्राघिमांशमा जाने अर्डर आयो… त्यतिबेला मेरो खुट्टा मड्केकोले मलाई पल्टनले तीन महिनासम्म बेस हस्पिटलमा एडमिट गरेर अक्षांश र द्राघिमांश देश जाने मेरो धोको अधूरै रह्यो नि ।
के भन्ने ? (बी)३ बी क्यूब बडा सित तर्क गरेर कुनै फायदा छैन । बी क्यूब बडाले आफ्नो बारेमा जतिनै विज्ञापन गरे पनि हामीलाई झिजो भने पटक्कै लाग्दैन । उनको विज्ञापन सुन्न मज्जा लाग्छ । र त गाउँ-घरका युवा-(बी)३बी क्यूब बडाको विज्ञापन सुन्न झुत्तिन्छन् । उनको विज्ञापन नाइन्टि नाइन पर्सेण्ट बित्त्थाको हावाको भए पनि सुन्दा हो जस्तै लाग्छ ।

(बी)३बी क्यूब बडा ठूलठूला कुरा हाँक्नमा पनि उस्ताद छन् । एकदिन हामी फुटबल मैदानमा गफिरहेका थियौँ । (बी)३बी क्यूब बडाले आफ्नो शक्तिको विज्ञापन हाँक्दै थिए अचानक गाउँकै हाउडे मामा त्यहाँ आइपुगे । मनमनै भनेँ, बल्लबल्ल विज्ञापन बडा र हाउडे मामाको जम्काभेट भयो.. अब कसले कस्तो विज्ञापन गर्ने हो, कसले हाउडे गफ सुनाउने हो यसबारेमा फुटबल मैदानमा भेला भएका हामी युवायुवतीहरूमाझ खुल्दुली भयो ।

(बी)३ बी क्यूब बडाले हाउडे मामालाई सोधेँ- ‘हन क्या हो तिमी त हस्याङ्ग पस्याङ्ग हुँदै पो आइरहछौ । के भयो ?’ हाउडे मामाको हावा कुरा शुरु भइहाल्यो- ‘अहिले त साइकल हाँकेर आएकोले यस्तो देखिएको नि । हिजो राति पो खतरा भयो नि ।
सबै- ‘के भयो मामा को भयो ?’
हाउडे मामा, अरे नभन यार । भनिसक्नु छैन । गजबै भयो नि ।

सबैले उनको हावा गफ सुनाइदिने आग्रह गरेपछि हाउडे मामा बोल्दै गए, अरे (बी)३बी क्यूब सर के भनूँ राति फारसबाट साइकल हाँकेर धुम्धुमति आइरहेको थिएँ, अचानक बाटैमा अजङ्को बाघ । लमक लमक गर्दै मकहाँ आउँदैछ । साइकल छोडेर भागुँ जस्तो पनि लाग्यो । तर अँध्यारोमा भाग्नु कहाँ भाग्नु । मेरो पालो फ्लास्कबाट तातो पानीले त्यसको मुखभरि छ्यापिदिए । तातो पानीले पोलेर हो कि केले हो कोनि बाघ जताबाट आयो त्यतै स्पिड कुद्दै लाग्यो ।

(बी)३बी क्यूब बडा बोले- ए…. त्यो बाघ कुद्दै साइँली बहिनीको दोकाननेर आएको थियो । यसो मुख छामेर हेरेको थिए… विचारा तातो पानीले नाकै खुइलिएको रहेछ । मेरो पाला मल्हम दलिदिएको थिए त्यो फेरि फारसतिरै पस्यो । ए… तिमीले पो तातो पानी छेपिदिएको ।

(बी)३ बी क्यूब बडाको कुरा सुनेर हाउडे मामा अक्क न बक्क परे । हामी पनि एकक्षण त अलमलियौ । विज्ञापने बडा र हाउडे मामाको बिग टक सुनेर ।

दुवैमध्ये (बी)३बी क्यूब बडाको कुरा अनि हाउडे मामाको हावाको कुरा सुनेर नै हाम्रो गाउँमा हाम्रो समय कटनी हुने गर्छ । दुवैका कुराहरू बेफाइदाका हुन्छन् भनेर हामीलाई थाहा हुँदा हुँदै पनि हामी उनीहरूको कुरा सुनिदिन्छौँ । यिनीहरुको गफमा विज्ञापन र हावाको कुरा हुन्छ भनेर जान्दा जान्दै पनि हामी गाउँका सबै यिनीहरूका कुरा चाख मानेर सुनिदिन्छौँ । यसले हामीलाई कुनै फायदा नभए पनि कम्तिको पनि यी दुई बूढाहरूले राजनीति, भोट र झण्डाको कुरा गरेर हामी युवा युवतीहरूको मगज धुलाइ त गरेका छैनन् । राजनीतिमा जबरजस्ती धकेलेर गाउँभित्र कसैसित शत्रुता, कुटपिट, लडाइँ झगडा गर्न लाएका छैनन् । यसैले हाम्रो यो गाउँ राजनीतिको शिकारले ग्रसित छैन । हाम्रो यो गाउँलाई झण्डी साटने देशानले भेटेको छैन । यी दुई बूढाको बिग टक वा हावाको गफले नै हाम्रो गाउँलाई पवित्र राखेको छ, सुरक्षित राखेको छ । हाम्रा गाउँका समस्त युवा युवतीहरू झण्डी बोक्ने, झण्डी साटने, झण्डी च्यात्ने पट्टि नलागेर यी दुइ बूढाकै हावा गफ सुनेर मस्त हुन नै व्यस्त छन् ।

राजनीतिको कुरा गरेर सोझ सिधाहरूलाई नभड्काई हावाकै गफमा भुल्याउने ? (बी)३ बी क्यूब बडा र हाउडे मामाजस्ता हाउडेहरू तपाईंहरूको गाउँ-घरतिर पनि भइदिउन् भन्ने पो लाग्छ मलाई । तर राजनितिको कुरा नगरी खाएको खाना कसरी पच्ने र ?

हिजोआज सबै राजनीतिको देसानले अलमलिरहेका छन् । हाउडे गफै भएपनि सुनाएर युवा युवतीहरूलाई भुल्याउने कहाँ पाइन्छ होला र ?

०००
खोलाचन्द फाप्री, जलपाईगुडी (भारत)