नेपाली हास्यव्यङ्ग्य अनलाइन पत्रिका

भूवनहरि सिग्देल :

सम्पादक महोदय,
फित्कौली अड्डा, कलङ्की कामठण्डाै

फित्कौलीले छोटो समयमा विशाल व्यङ्ग्य सदन तयार गरेकोमा यसका योजनाकार तथा वक्र विचारका कुरुपस्वरुपलाई नै मट्याङ्ग्रा बर्साउने इरादा पैदा भयो । पूर्वजले बनाएको तर जीर्ण-शीर्ण डबलीमा बाङ्गाखुट्टे हुल जम्मा गरेर ढोल तबला ठटाउन तम्तयार सिपाहीका फौज देखेपछि मेरो त मुटु नै काम्यो । कामज्वराे फुट्छ कि झैँ भयाे …. ।

अब म गाईखाने भ्रष्टाचार गर्दिनँ । चोरीखाने कानुन बनाएर त्यो आडमा डकैती त मरिजाउँ गर्दिनँ । खाने नाममा हसुरेर उर्मुट्टिएको भुँडीले सुकेनास लागेका लिखुरालाई ठेलेर ढलाउन्नँ ।

चित्लाङको चोरबाटो चेली लगेर चितुवाको खोरमा हालेको त देख्नुहुने छैन तर प्लेनै चढाएर जनता बेच्ने खुराफाती गरेको देख्नुभो भने पुलिसलाई हतकडी नलगाउने साउती गरिदिनोस् सुटुक्क भागबन्डा मिल्छ । म भाइमारा होइन नि । त्यो भाग लिन भाउजूलाई पठाउनोस् है सङ्गपादकज्यू । तपाइँको अनुहार देखिनुहुन्न क्या !

त्यो मोटो रकम जत्ति ठूलो घर भए पनि त्यसमा अट्दैन । १५ रोपनी जग्गाभित्र बसेको छु भन्ने घमन्ड पटक्कै नगर्नोस् महोदय । फित्कौलीवालाले देख्छ त्यसभित्रको खाडल र कुनेटा । बरु यसो गर्नोस् म सल्लाह दिन्छु । केटाकेटी बेला तपाइँ छिमेकीको बारीमा फुत्त खुबै ज्यामिर चोर्नुहुन्थ्यो नि । हो त्यै बेला दाहिने हातको चोरऔँलोमा काँडो गढेको थियो नि । याद भो हैन ? अहिले त्यसको खिल पल्टेको छ । हो त्यो खिल जोगाउनोस् है !

मेरो जस्तो अवस्था तपाइँको हैन नि । तपाइँ त त्यसलाई राष्ट्रिय छुचुन्द्रे घाउ बनाउन सक्नुहुन्छ दाइ । खुरुक्क मन्त्री मण्डलबाट सिङ्गापुरमा औषधी गराउन जाने निर्णय गराउनोस् । बिरामी कुरुवा चाहियो नि ! हो बिचरी भाउजूलाई बोराको पैसा बोक्न लाउनोस् । खोक्ने खोकिरहन्छन् के नाप्छन् ! तपाइँ भुरुक्क उडेर त्यता जानोस् ।

यता राष्ट्रिय घाउका उकुच दुखेका छन् नि । हो त्यसका खेल गर्नोस् । सास बाँकी रहेसम्म तपाइँ नै हो प्रधान मन्तरी । १२ पटकसम्म त्यो पद धारण गरेर कीर्तिमान् बन्नुपर्छ क्या । त्यो खेल खेल्नोस् तर औलाको खिल चिर्ने हैन । त्यसलाइ जोगाउनोस् । त्यो त बुटी हो बुटी । पछिसम्म काम लाग्छ बाबै ।

अँ, ओखतीका बिल प्रशस्तै बनाएर ल्याउन नभुल्नुहोला नि । पैसा राम्रै बैङ्कमा लुकाएको खबर सुन्न पाउँ । त्यहाँसम्म मट्याङ्ग्रो हान्ने मान्छे छैन । ढुक्क हुनोस् ।

खालि बाङ्गो मात्र मन पराउने व्यङ्ग्य सम्पादक महोदय, यो कुरोको चुरो तपाईंको फित्कौली मार्फत सोझै हाम्रा राष्ट्रिय दाजु भाउजूसम्म पुगोस् भनी यो चिठी भेजेको छु । जो हो सो गरिदिनू होला !

उही तपाईंको
छन्दे कवि

०००
हाल- ललितपुर मुकाम