नेपाली हास्यव्यङ्ग्य अनलाइन पत्रिका

ढाकामोहन बराल :

“जागिर त खाइयो तर मजा आएन । खर्च धान्न नसकिने”- राकेशले भन्यो ।
“त्यही त काठमाडौंको बसाइँ । घर भाडा र गाडी भाडामा सबै सकिन्छ”- उमेशले पनि माइक्रोबस भित्र कुप्रो भएर उभिँदै भन्यो ।

उनीहरू चढेको माइक्रोबसलाई छलेर एउटा मोटर साइरन बजाउँदै अगाडि बढ्यो । “हेर त हामीले तिरेको कर पोलेर धुवाँ उडाएका”- माइक्रोबसको ड्राइभर करायो । माइक्रोबसमा रेडियोमा समाचार बजिरहेको थियो । “मन्त्रीहरूले एक महिनाको तलब भूकम्प पिडितको लागि सहयोग गर्ने”- रेडियोमा भनेको सुनियो ।

राकेश र उमेशले एक अर्कोलाई हेर खिस्स हाँसे । “बस्ने निवास, खाने भात, डुल्ने गाडी र औषधि मुलो पाउने भए के को एक महिनाको ? सधैँको तलब दिइन्थ्यो नि”- राकेशले भन्यो ।

लगातार साइरन बजाउँदै हिँडेका मन्त्रीहरूका गाडीले पुतलीसडक कोलाहल बनेको थियो ।

०००
पोखरा ७ मासबार, कास्की ।