नेपाली हास्यव्यङ्ग्य अनलाइन पत्रिका

टीकाराम जोशी :

सजिसजाउ महिलाहरूको भीडबाट उम्किएको अनुहारको झलक पाउने बित्तिकै राजले दुवै हात जोडेर नमस्कार गरे र रमातिर फर्केर हेरे । रमाले पनि उनको इशारा बुझैर नै होला दुवै हात जोडेर नमस्कार गरिन् । त्यसपछि राजको पछि पछि लागेर उनले पनि मन्दिरको परिक्रमा पुरा गरिन् ।

दुवैजना सँगै भएर पनि आज उनले रमा आफूबाट टाढा भएको महसुस गरिरहेका थिए ।
“तिमीले टिका लगाएनौ ?” रमाको अनुहारमा वसन्त बहारको कामना गर्दै राजले सोधे ।
“आजदेखि हजुरलाई जे मन पर्छ त्यहि गर्छु भनेकी छु । हजुर खुसी भए सबै थोक पुग्यो मलाई ।” रमाले मुस्कुराउँदै भनिन् ।

अरु बेला उनले चढाउनका लागि मन्दिर बाहिर बेच्न राखेका फूल प्रसादको सानो टोकरी किन्ने गर्थिन् र पुजारीबाट टिका मागेर आफू लगाउँथिन् र उनलाई पनि लगाइ दिन्थिन् ।
“हैन ! मैले पूजा सामग्री किन्नका लागि पैसा दिएको थिए नि ।” राजले मनमा परेको गाँठो फुकाल्न खोजे ।

“नदीलाई सफा र शुद्ध राखे पो माघे स्नान गर्न सकिन्छ; पूजाको नाममा पूजा सामग्री नदीमा बगाएर नदी प्रदुषित र दुर्गन्धित बनाउनु हुँदैन, भन्नुभएको हैन ।” रमाले गम्भीर हुँदै भनिन् ।
“परिवर्तन पीडादायक हुँदो रहेछ ।” राजले मनमनै सोचे ।

०००
टीकापुर