नेपाली हास्यव्यङ्ग्य अनलाइन पत्रिका

ढाकामोहन बराल :

घरको टि. भी. कार्टुन चित्र देखिन छोडेको थियो । “बाबा न्यूज पेपर आएको छैन ?”
छोराको प्रश्नले दुईचार वर्ष पछि एक समाचार दैनिकको नियमित ग्राहक बनेको थिएँ । छोराको व्यवहारले मेरो मनका खुशी देखिन थालेको थियो । हामीले चाहेको कार्यक्रम हेर्दा टि. भी.को रिमोट कन्ट्रोलरमा उसको हस्तक्षेप पनि हुँदैनथ्यो ।
“छोरो अब बुझ्ने भएछ ।” उसकी आमाले भनिन् ।
“दुईचार दिन टि. भी. नहेरेर हुन्छ र ? कुन दिनदेखि कब्जा गरेर बस्ने हो । कुन शिक्षकले आठ कक्षामा पढ्ने भए पछि तिमी ठूलो मान्छे हुन्छौ भनेछन् । तीन महिना अगाडि देखि ठूलो मान्छे हुने प्रयास् गर्दै छ ।” मेरो खुशी मनले पनि संशय व्यक्त गर्‍यो ।

“बाबा चुनाव कसले जित्ला ?” छोराले सोध्यो ।
“अहिले कहाँ चुनाव हुन्छ र ?” मैले प्रतिप्रश्न गरेँ । मेरो प्रश्नको जवाफ छोराले दिएपछि छोरो साच्चिकै बुझ्ने भएछ जस्तो लाग्यो ।
उसले पत्रिकाको समाचार देखाउँदै भनेको थियो “भारतको चुनावको कुरा गरेको मैले मलाइ थाहा छ, नेपालमा त सरकार परिवर्तन हुन चुनाव हुनै पर्दैन नि ।”

०००
पोखरा ७ मासबार, कास्की ।