नेपाली हास्यव्यङ्ग्य अनलाइन पत्रिका

जहाँ रूप हेरेर दाँजिन्छ फूल
र भन्छन् उही फूल नारी स्वरूप
घमन्डी हुने रूपको हुन्छ चर्चा
गुनी रूपले गर्न जान्दैन ईर्ष्या !!

छ ईर्ष्या सधैँ फूलको फूलमाथि
बनेनन् यहाँ फूलका फूल साथी
चमेली कहाँ सुन्दरी छे म भन्दा
भनी बागमा फिस्स हाँस्दैछ चम्पा !!

नयाँ कोपिलाले यहाँ फुल्न खोजे
नयाँ मित्रका साथमा भुल्न खोजे
ठुली फूल जो फक्रिएकी छ पैले
उही रोक्न खोज्छे बुझौँ है सबैले !!

जहाँ फूलको शत्रु नै फूल हुन्छन्
जहाँ फूलको दुःखमा भृङ्ग रुन्छन्
स्वयम् हेप्दछन् फूलले फूललाई
तिनै दोष दिन्छन् सधैँ भृङ्गलाई !!

यता लाग्दछन् वा उता लाग्न थाले
सधैँ हेर दोधार छन् लालुपाते
कि हुन् छद्मभेषी कि यी ढुल्मुले हुन्
जता जे सुकै हुन् बिगार्ने यिनै हुन् !!

कुनै फूल सासू बुहारी कुनै छन्
सधैँ खेल खेल्छन् जुहारी तिनै झन्
कतै नन्द थप्छन् कुरामा कुराले
कुनै बुन्दछन् जाल झैँ माकुराले !!

सदिच्छा छ मेरो सबैको भलाइ
सधैँ साथ होस् फूलको फूललाई
फुली फूल आनन्दले हाँस्न पाऊन्
र मान्छे सधैँ फूल हेरी रमाऊन् !!

मेनपा-१३, चारआली, झापा
हाल : बेलायत