नेपाली हास्यव्यङ्ग्य अनलाइन पत्रिका

सुनिंदैछ
अब अभिनेताहरु पनि नेता बन्ने रे
टुँडीखेलमा उभिएर
राजनीति पनि नाटकै हो भन्ने रे
उसो भए जिताउँ एउटा गतिलो कानुन बन्नुपर्छ
संसद भवनलाई अन्तर्राष्ट्रिय नाचघर भन्नुपर्छ ।

गरीबको अभिनय गर्नुपर्छ
मस्तीमा रमाउँनुपर्छ
अङ्गालो र चुम्बाचाटी बेचेर
पैशा कमाउँनुपर्छ
रिसोर्ट र स्टारबारहरुमा
रक्सी र कवाफ घिच्नुपर्छ
साँझसाँझ अर्कैको घर कोठामा
बेडसिन खिच्नुपर्छ
मुस्ताङमा आङ तन्काउँनु पर्छ
पूर्वेली छ्याङ दन्काउँनपर्छ
विदेशी निर्देशनमा स्वदेशी राग अलाप्नुपर्छ
स्वाभिमानको टोकरी बोकेर बिदेशी भाग थाप्नुपर्छ ।

वरपर डुल्नुपर्छ महोत्सवमा भुल्नुपर्छ
स्क्याण्डलको खेतीगरी मिडियामा खुल्नुपर्छ
कहिले फुट्यो भन्नुपर्छ कहिले जुट्यो भन्नुपर्छ
अवसरमा कता नजिक हिसाब गरि गन्नुपर्छ
कहिले पर्दा तान्नुपर्छ कहिले माइक हान्नुपर्छ
ठेलामठेल र जालझेलमा खेल्न पनि जान्नुपर्छ
डाइलग पनि गतिलै छान्नुपर्छ
कथा अनुसारको कपडा सिलाउँनुपर्छ
दृश्य अनुसारको परिवेश मिलाउँनुपर्छ
नायक नायिकाको लागि नै देशको बजेट बन्नुपर्छ
संसद भवनलाई अब
अन्तर्राष्ट्रिय नाचघर भन्नुपर्छ ।

गौरादह, झापा