नेपाली हास्यव्यङ्ग्य अनलाइन पत्रिका

हाम्रा श्याम दाइले
गाउँ गाउँबाट उठ भनेर
साथीहरू शहर आए
मनग्गे कमाए
सन्तानलाई विदेश पढ्न पठाए
बेला मौका आफू पनि त्यतैतिर धाए
खै आफूले त त्यस्तो जानिएन
श्याम दाइका कुरा बेलैमा मानिएन
गाउँघरमै बसियो
गोठ र बारीमै फसियो
जानिएन छ श्याम दाइ !

भनिन्छ आजभोलि सिंहदरबार
गाउँमै पठाको छ
सिंहदरबार वरिपरि चाका लागेको छ
मह काड्ने मान्छे पनि खटाको छ
हात मात्रै होइन भाँडै चटाको छ
तर पनि
हरेक बिहान गाउँगाउँबाट उठ्छ युवा
झोला बोक्छ
एयरपोर्ट छिर्छ र विदेश बनाउँछ
बस्तीबस्तीबाट उठ्छ र शहर धाउँछ
आफू चैं
गाउँघरमै बसियो
गोठ र बारीमै फसियो
जानिएन छ श्याम दाइ !

श्यामदाइ ! तपाईंले भनेजस्तै
कलम लिएर उठेको भए
म पनि नक्कली बील र नक्कली प्रोजेक्ट कोरेर
दुईचार विदेशीका थेसिस
यताउति चोरेर
कलमकै आडमा दुईचार ढोका थर्काएर
झुटो हौवामा दुनियाँ हर्काएर
गाउँतिरबाट शहर पस्थेंहुँला
हो तपाईंले भनेजस्तै
कला लिएर उठेको भए
नेताकै फर्माइसमा
नेतालाई अगाडि राखेर
उन्कै क्यारिकेचर गर्दै
कहिले मलेसिया जापान
खाडी अमेरिका डुल्दै
राजधानीमा नै बस्थेंहुँला
उल्टो आफू चैं
गाउँघरमै बसियो
गोठ र बारीमै फसियो
जानिएन छ श्याम दाइ !

हो दाइ !
आज पनि गाउँगाउँबाट उठिरहेछन् मान्छेहरू
र शहर छिरिरहेछन्
विदेशी बाजा भिरिरहेछन्
विदेशी गीत गाइरहेछन्
पराई केकमा रमाइहेछन्
ठूलै मान्छेको लबेदाको फेर समाइरहेछन्
कुम जोडेर फोटो खिचाइरहेछन्
आफू चैं
गाउँघरमै बसियो
गोठ र बारीमै फसियो
जानिएन छ श्याम दाइ !

श्याम दाइ !
तपाईंले गाउँगाउँबाट उठ लेख्नुभो
साथीहरूले गाउँनु भो
देशको मुहार फेर्नुपर्छ भनेर सुनाउँनु भो
हामीले त्यसैहोला ता नि भन्यौं
साथीहरू जाग्नु भो
राजनीतिमा लाग्नुभो
देशको मुहार त थाहा छैन
वहाँहरूको मुहार चैं फेरिएको छ
सम्पन्नताले घेरिएको छ
आफू चैं
गाउँघरमै बसियो
गोठ र बारीमै फसियो
जानिएन छ श्याम दाइ !

गौरादह, झापा