नेपाली हास्यव्यङ्ग्य अनलाइन पत्रिका

कति साथी तात्तिनुभएको छ
कति आत्तिनुभएको छ
कति मात्तिनुभएको छ
कति पात्तिनुभएको छ
म अहिले कविता लेख्दिन यारों !

कति साथी धेरैवटा झण्डा एउटै काँधमा भिरेर
पुँजीवाद र साम्यवादको दोहलो काड्दै हुनुहुन्छ
कति साथी अवसरको डाडु नपाएको झोंकमा
छानामाथिको झण्डा फाड्दै हुनुहुन्छ
कतिलाई तिहार आएको छ
कतिलाई बहार कतिलाई मारामार छाएको छ
यस्तो बेला लेख्नुपर्ने केही देख्दिन यारों
म अहिले कविता लेख्दिन यारों !

कतिलाई मासु चिउरा छ
कतिलाई फलामको चिउरा छ
हिजोसम्म बोल्नेहरु नबोल्ने भएका छन्
अरुलाई पछार्ने भित्रभित्रैको खेल
हम्मेसी कतै नखोल्ने भएका छन्
कसैलाई कोही जसरी पनि अगाडि बढाउँनु छ
कसैलाई कोही नभइ हुन्न
जबर्जस्ती काँधमा चढाउँनु छ
कोही भयङ्कर रिसाएका छन्
बर्षौं अघिको आस्था बिसाएका छन्
यस्तो बेला कसैको बाटो छेक्दिन यारों
म अहिले कविता लेख्दिन यारों !

जिन्दावादमा मरेका छन् कोहीहरु
कहिले यता कहिले उता सरेका छन् कोहीहरु
अरुलाई गाली गर्न झरेका छन् कोहीहरु
छुद्र वचन लिएर अघि परेका छन् कोहीहरु
यस्तो बेला केही समेट्दिन यारों
म अहिले कविता लेख्दिन यारों !

आजभोलि मान्छे
आफूलाई उचा अरुलाई निच्चा देखाउँन कसिएको छ
आफूलाई सभ्य अरुलाई खिच्चा देखाउँन कसिएको छ
गर्मी छ दिन तातिएको छ
चुनावी नसाले मान्छे मातिएको छ
यो बेला चुप लाग्नु बाहेक अरु केही देख्दिन यारों
म अहिले कविता लेख्दिन यारों

गौरादह, झापा