नेपाली हास्यव्यङ्ग्य अनलाइन पत्रिका

नखाई कनै भोक जित्नेहरू छन्
दुखाई विनै चोट जित्नेहरू छन्
कुरा भिन्नताको बुझे हुन्छ साथी
नपाई कनै भोट जित्नेहरू छन् !!

कुराले सधैँ देश सम्पन्न पार्छन्
विरोधी भए हेर छानेर मार्छन्
उचाल्ने पछार्ने कलाकारिता छ
अरूबाट कर्तव्य छिन्नेहरू छन् !!

दुखीमाथि झन् दुःख बर्सात हुन्छ
सुखी ऐशमा मोजमा हात धुन्छ
कहानी सबैको सधैँ भिन्न-भिन्न
यहाँ कर्म आफ्नो नचिन्नेहरू छन् !!

स्वयं भन्न पाए अरू चाहिँदैन
अहं बन्न पाए कसैले छुँदैन
न उद्योग खोले न ता रोजगारी
युवा शक्तिलाई निफन्नेहरू छन् !!

बिते वर्ष धेरै अझै धेर बित्छन्
सबै ठिक्क पार्ने नयाँ नीति झिक्छन्
अझै भन्दछन् देश श्रृङ्गार गर्छु
यहीँ काख आमा उधिन्नेहरू छन् !!

न इच्छा छ मेरो गई भोट हाल्न
न इच्छा घरैमा बसी खेर फाल्न
म हालूँ नहालूँ मलाई दुहुन्छन्
यहाँ भोट बेच्ने र किन्नेहरू छन् !!

समस्या जहाँको त्यहीँ आजसम्म
हिजो दाब्रिएका भए आज डम्म
डस्यो देश दुर्भाग्यको नाग आई
कहाँ छन् र नेता, सपेराहरू छन् !!

मेचीनगर, झापा, हाल अमेरिका