नेपाली हास्यव्यङ्ग्य अनलाइन पत्रिका

सारा दलाली भतुवा र मुर्दा
बाँडेर पैसा मतदान गर्दा
कस्तो रडाको अभियान छर्दा
जात्रा मनाए असुलेर चन्दा । १

चोरी चकारी अभिमान फुर्दा
यी धुन्धुकारी खलिहान झर्दा
भर्छन् भकारी जबकाम पर्दा
जात्रा मनाए असुलेर चन्दा । २

रात्री दिवामा अनिकाल पर्दा
जो मासु खाने हलिया उतार्दा
साँप्रो खशीको मतदान माग्दा
जात्रा मनाए हसुरेर चन्दा । ३

जो हुन्छ राम्रो किनलाग्छ पर्दा
ढोंगी बतौरे अघिसर्छ लड्दा
कालो बिरालो बनि दूध चोर्दा
जात्रा मनाए असुलेर चन्दा । ४

ज्यूँदा मलामी घरखेत धन्दा
मुर्दा गुलामी परघात फन्दा
नारा फलाक्ने गठजोड भन्दा
जात्रा मनाए असुलेर चन्दा । ५

भोका र नाङ्गा अपवित्र बन्दा
गुण्डा लफङ्गा सहकार्य गर्दा
सारा मलामी जब दुष्ट उठ्दा
जात्रा मनाए असुलेर चन्दा । ६

भरतपुर, चितवन