नेपाली हास्यव्यङ्ग्य अनलाइन पत्रिका

दिनभरि
कडा सुरक्षाबिच
छाप लगाएका कागज खाएर
टन्न अघायो बाकस,
सिलबन्दी गरेर अक्षत भएको
मुचुल्का बनाइयो ।
अघि पछि बरियातको लर्को लाएर
अन्माइयो कुमारीलाई र
बुझाइयो दुलाहाको घरमा
चारैतिरबाट ल्याइएका
अनेकौँ जादुका कुमारी बाकसहरू ।

मध्यरातमा सिल तोडेर,
कुमरी बाकस हरू खोलिए ।
एकएक गर्दै कसैले हातले समातेर
पालैपालो मधुमास मनाइदैछ ।
बाहिर निस्केर घरिघरि
चिच्याउछन् जादुका बाकसहरू ।
वरिपरि बसेकाहरू कान थापेर सुन्छन्
कसैलाई मज्जा आउँछ
कसैलाई नमज्जा पनि लाग्छ ।
बाकसबाट जादु निस्कन्छ
हरेकपल्ट मुटु धड्काउने
जादुका आवाजहरू ।

विश्वविद्यालयका डिग्रीहरू फेल हुन्छन्
कोही पिना हुन्छन् कोही तेल हुन्छन् ।
तुरुरु चुहिन्छ पसिना
कोहि चम्किन्छन्,
कसैलाई हम्किन्छन् ।
पहिले हारेकाहरू जित्छन्
जितेकाहरू हार्छन् ।
कसैले कसैलाई नसमातिकन
पछार्छन् ।
कसैले नसोचेको
परिणाम निस्कन्छ बाकसबाट,
मान्छेका मन जितेकाहरू
ओठमा लाली पोतेर अनुहारमा अबिर दल्छन्
मान्छेको मन नजितेकाहरू
उभिएको उभियकै ढल्छन् ।

जादुका कुमारी बाकसहरू
सम्भोगित भएर
धमाधम जन्माउँदैछन्
पाँच बर्ष आयु भएका मान्छेहरू
जन्ती गएकाहरू
धमाधम अन्माउँदैछन् भान्सेहरू ।
जादुको बाकस प्रसबले रित्तिदै जाँदा
भरिदैछन् सिँहदरबारका कोक्राहरू ।
हेरौँ गुदी जन्मिए कि बोक्राहरू ?
रस जन्मिए कि छोक्राहरू ?
जादुका बाकसहरू धमाधम कोरलिँदै छन् देश भरि ।

खाँदबारी, संखुवासभा