नेपाली हास्यव्यङ्ग्य अनलाइन पत्रिका

बच्चा कोरल्न नसकेको
बाँझो समयको काखमा
डङ्ग्रङ्ग पल्टिएर
प..र क्षितिजको घुर्मैलो आकाश नियालिरहेछु
त्यो पनि हाम्रो मानसिक अवस्था जस्तै छ ।

हिजोको गन्धकको मातले दिशा भुलेका
पहेंला बादलहरू
गुप्त उथलपुथलको हुण्डरी त्रास धम्की दिएर
रुखका कापमा
टुसाउँन लागेका बर्तमानका मुनाहरूलाई
सम्पूणर् रुखैसँग निमोठ्ने भय बेच्दैछ ।

बर्षा त हिजो पनि कहाँ सजिलो आयो र ?
कानका जाली नै निमोठ्ने
चट्याङ आतङ्क
घरै खरानी बनाउला झैं को
कान्लामुनिको आगो
शनी पूजा
खोरका बोका कुख्रा
गोठका राँगा भैसीको बलिदान
देवीथानका भाकलहरू सबै सबै ब्यहोरेर
बर्षा बोलाएका हौं हामीले ।

तर
ऊ पनि फूर्किएर पस्यो घुर्किएर पस्यो
ज्यामिरेलाई भत्काएर पस्यो
छाप्राहरूलाई डस्यो
हाम्रा आस्थाका खेतहरूलाई उँधै लगायो
हाम्रो निरपेक्ष स्वाभिमानलाई
उँधै बगायो
तमास गर्यो र पनि सहनै पर्यो ।

आज जताततै टेक्ने धरातलमा धाँजा फाटेको छ
दिनहुँ सडकमा पयरीय धूलाको जुलुस चल्छ
जङ्गलको आगो र शहरको धुवाँले
उस्को मेरो, मेरो उस्को नाक जल्छ
हिजोको बबण्डर फेरि आउँछ कि भनेर
भित्रभित्रै थर्किरहेछौं
तर पनि हामी
अर्को बर्षा पर्खिरहेछौं ।

फेरि रक्ताम्य निन्द्रा पर सारेर
जिन्दगीको कमिजमा
एउटा बाहुला माथि एउटा तल झारेर
भागी जाने रेलको
अन्तिम डिब्बामा
हतार हतार चढिरहेछ समय ।

ब्ल्याक होलको अर्को पाटोमा
फ्लास होलको परिकल्पना साँधेर
आइन्स्टाइनको सापेक्षतावाद बाँचेको छ

शहरमा रातपरेपछिको आवाजमा
टाढा कतै अन्धकारको छायाँ खस्छ
र मान्छेको रगत
हिउँ जस्तै जम्छ
क्षितिजपारिको देशमा चलेको
अनपेक्षित युद्धको पिरो धुवाँ
नाके टोड्कीको साम्राज्य पिरोल्दैछ ।

गौरादह, झापा