नेपाली हास्यव्यङ्ग्य अनलाइन पत्रिका

राता भाले वरपर कुदी गर्न थाले तमासा
यस्तो देखी सुजन सबमा बढ्न थाल्यो निराशा
हेर्दाहेर्दै गतिमति कठै स्वार्थमा फाल्न थाले
झालेमाले रङबिरङका लड्दछन् थुक्क ! साले ।

आफैँ मात्रै दिनहुँ कुखुरी काँ गरूँ भन्दछन् यी
आफैँ मात्रै खुपुखुपु सधैँ आँ गरूँ भन्दछ्न् यी
नङ्ग्रा गाड्छ्न् हतपत धुरी चड्दछ्न् खानलाई
ढुक्छन् भाले सतत रुपियाँ जेपमा हाल्नलाई ।

बास्छन् उल्टो किनकिन त्यसै साँझ पर्नै हुँदैन
आफ्नै साथी नजिक तिनका माझ पर्नै हुँदैन
गाली गर्छन् अपजस दिई नित्य सत्तोसराप
लाई आगो घर पनि सके जीर्ण पारे धराप ।

पोथी देख्दा खुरुखुरु कुनै चढ्छ लाजै नमानी
अल्छे छन् यी हरपल ठगी बास्न छोडे बिहानी
भाले पाल्ने रहर मनको मार्न थाले सबैले
बेचौँ भन्दा पनि सहजले बिक्न छोडे त्यसैले ।

हाटा गर्छन् सदन नबसी ठुङ्न जान्छन् भकारी
भाग्दैनन् यी सितिमिति कुनै क्षीण बोली हकारी
आफ्नाआफ्नै लहड यिनका झुन्ड हुन्छन् ससाना
प्रायः खान्छन् रुस र चिनियाँ देशको मिष्ठ दाना ।

दमक, झापा