बिन्दु दहाल ‘मूकदर्शक’म को हुँ ?
यता म खान्छु देशको उता गएर पथ्थर म हान्छु बन्धु भाइकै फुटाउने छु खप्पर मजा छ लुट्न देश यो चुनाव जित्छु हर्दम कुकर्म गर्न सक्छ को म ढाँट्छु सत्य निर्मम ।
म धान खर्ब खर्बको विदेशबाट ल्याउँछु
म दाल तेल वस्त्र यी विदेशकै मगाउँछु
युवाहरू स्वदेशका प्रवासतर्फ खेद्दछु
म कर्मशील पाखुरा समुद्रपारि बेच्दछु ।
जडीबुटी सबै उतै निकास गर्छु छन् जति
किनेर औषधीहरू भँडार भर्छु सम्प्रति
नदी र काठ छन् यहाँ म बेच्छु सूक्ष्म दाममा
धराप पार्छु देश यो विरूप पार्छु नाममा ।
स्वदेश पुत्र हूँ भनी म भक्तिगान गाउँछु
ललाट माथ यी दुवै उधै खुबै झुकाउँछु
धनी म देश पार्छु यो गरेर पौरखी कला
पुगेर पारि गर्वले मिलाउने छु मै गला ।
यता म खान्छु देशको उता गएर पथ्थर
म हान्छु बन्धु भाइकै फुटाउने छु खप्पर
मजा छ लुट्न देश यो चुनाव जित्छु हर्दम
कुकर्म गर्न सक्छ को म ढाँट्छु सत्य निर्मम ।
म राष्ट्र गीत गाउँदै अखण्ड देश माग्दछु
परन्तु गोप्य रूपमा सखाप पार्न लाग्दछु
विकास गर्छु देशको भनी फलाक्छु बाहिर
पकेट भर्छु बेस्सरी म हुन्छु टम्म आखिर ।
दमक, भापा
Subscribe
Login
0 Comments
Oldest
