नेपाली हास्यव्यङ्ग्य अनलाइन पत्रिका

जुम्राहरूले दुःख दिइरहन्छन्
के गर्नु वातावरण नै विकृत छ
त्यो शुद्धता कहाँ पाऊँ अहिले
भोका राँगाहरू चर्न निस्केपछि
डँडेल्नाभरि जुम्राहरू टल्किन्छन्
तिनै फेरि मान्छेमा सल्की गाउँभर
लमकलमक लम्केकै हुन्छन् नि
तिनीहरूलाई तालिम दिइन्छ र
सकेसम्म गहिरोसँग चुस्ने चाल
प्रशिक्षण कार्यक्रममा सिकाइन्छ
यसरी प्रशिक्षित जुम्राहरू सर्वत्र छन्
चुसाइको कसैले आबाज निकाल्दैन
न चुसिने नै कुनै विरोधमा उत्रेको छ
ऊ पनि केही समय बित्न नपाई फेरि
नयाँ जुम्राको अवतारमा फेरिएको हुन्छ
यो जुम्राचक्र ताजुबलाग्दो छ हेर्नलाई
यी पुस्ताका पुस्ता नयाँनयाँ शैलीमा
नयाँनयाँ तन्त्रका भेषमा गाउँसहरलाई
कब्जा गरेर अभीष्ट साध्न माहिर छन्

हे जुम्रावतार प्रभु ! लीला तिम्रो अपार !!

२०७९/३/२५