नेपाली हास्यव्यङ्ग्य अनलाइन पत्रिका

बाजे पण्डितराज काख गतिलो पायौ र कासी गयौ
सारा संस्कृत शास्त्र पढ्न कसियौ ज्ञानी र विद्वान् भयौ
भन्दै गर्नु छ कर्म देश घरमै सत्मार्गमा होमियौ
लेखी काव्य समाजमाझ छरियौ शार्दूलझैँ गर्जियौ ।।१।।

घाँसीको उपदेशले अवनिमा केही गरौँ सम्झियौ
राखे कीर्ति भविष्यमा स्वजनले सम्झेर बस्छन् बुझ्यौ
नेपाली मनभित्र दर्पण भयौ संस्कार शिक्षा दियौ
हाम्रो संस्कृति लोप हुन्छ डरले शार्दूलझैँ गर्जियौ ।।२।।

राणाकाल थियो निरङ्कुस अहो क़ैदी थियो देश नै
बोलीमा व्यवहारमा र मनमा पीडा दिँदै हर्दमै
कारागार पुग्यौ तथापि मनको इच्छासँगै जन्मियौ
राँकोझैँ जब दीप उज्ज्वल बन्यौ शार्दूलझैँ गर्जियौ ।।३।।

नेपाली न त बुझ्न संस्कृत यहाँ सक्थे तिमीले सक्यौ
हाम्रा शास्त्र परम्परा नबुझिने बुझ्ने गरी पस्कियौ
भाषा एक बनोस् बनोस् मुलुक यो भन्ने इरादा गर्यौ
यौटा सूत्र नयाँ दियौ सरलमा शार्दूलझैँ गर्जियौ ४।।

नेपाली मुखबाट बर्सिन पुगे श्रीराम गाथा यहाँ
भाका एक बनेर गुन्जिन गयो सम्पूणर् रामायण
तिम्रो त्यागसँगै परिश्रम फुल्यो पर्याय भाषा बन्यौ
हाम्रो नैतिकता उठाउन तिमी शार्दूलझैँ गर्जियौ ५।।

मेचीनगर, झापा
हाल बेलायत