नेपाली हास्यव्यङ्ग्य अनलाइन पत्रिका

शिव जस्तै पति पाउन अर्को जुनी कुर्नु पर्छ
सबै धर्म, पुण्य जति यै जुनीमा गर्नु पर्छ ।
तर पनि गाह्रै पर्ला पाऊन लाई त्यस्तो पती
खोज्दै होलान् संसारमा महिलाहरू भए जति !!!

स्वास्नीहरू भोकै बस्दा लोग्ने अमर हुने भए
जनसंख्या हेर आज महिला नै धेरै भए ।
मिली गर्नु जे गर्नु छ, व्रत बसौं, पूजा गरौं,
धर्म संस्कृतिको नाममा अचाक्ली भो यो नगरौँ ।

तीज हुन्छ एक दिनको, महिनौं त्यो दर चल्छ
आम्दानीको घाँटी सानो, खर्च हेर्दा खसी ढल्छ
नाचौँ गाऔँ रमाइलो सभ्यताको पाठ पढौँ
धर्म संस्कृतिको नाममा अचाक्ली भो यो नगरौँ !!

कति स्वास्नी पोईटिंग्रे, जोईटिंग्रे लोग्नेहरू
कतै च्वाप्प म्वाई खाने, कतै खुट्टा ढोग्नेहरू
दुनियाँ यो रंगमन्च नाटक हामी पात्रहरू
धर्म संस्कृतिको नाममा अचाक्ली भो यो नगरौँ !!

गीत होईन समाजमा बेईज्यत भई नाङ्गिनलाई,
नाँच होईन जिउमात्र ढचक् ढचक् बाङ्गिनलाई
गीत बनून् संस्कृतिका लक्षभेदी बाणहरू
धर्म संस्कृतिको नाममा अचाक्ली भो यो नगरौँ !!

सभ्यताको सिँढी आज ओरालो पो झर्दैछ कि ?
संस्कृति यो गाँउ घरमा हामी सँगै मर्दैछ कि ?
क्षणिक हो यो उम्लिएको कु-संस्कृति छोडौँ बरु
धर्म-संस्कृतिको नाममा अचाक्ली भो यो नगरौँ !!

०००
मेनपा १३, चारआली, झापा
हाल, बेलायत