नेपाली हास्यव्यङ्ग्य अनलाइन पत्रिका

दशैं आएछ
गाउँमा भेडा खोज्न
गल्लावालहरू पस्न थाले
“नमस्कार है आमा” भन्दै
पिर्का र पिंडीमा बस्न थाले
“हामी तपाईंहरूकै मान्छे त हौं नि !” भन्न थाले
गोजीबाट हरिया नोट निकालेर गन्न थाले
दशैं आएछ !

दशैं आएछ
तर कसलाई आएछ ?
भेडालाई कि गल्लावाललाई ?
भेडाहरू गुजमुज्ज परेर
त…ल शहर झर्ने बाटो हेरिरहेछन्
लामाछोटा लामाछोटा सास फेरिरहेछन्
भोलि त्यही बाटोमा भीड सजाउँनु पर्ने
भ्या .. भ्या… गर्दै स्वतन्त्रताको गीत गाउनुपर्नेछ
गल्लावालहरू भेडा र पैसाको दोहोरो अर्थ बोकेर
भेडाहरूलाई हर्काउँनेछन्
बाँदर लड्ने तारे पहरालाई थर्काउँनेछन्
दशैं आएछ ।

दशैं आएछ
हिजोको स्वादमा दाँत कोट्याउँन पल्किएका
श्रीमानहरू
कौशी र बार्दलीबाट
गाउँको बाटो नियाल्दैछन्
प…र कतै गल्लावालको झझल्कोमा अल्झिएर
उत्साही आँखाहरू फाल्दैछन्
फेरि एकपल्ट पुरानु स्वाद फर्काउनु पर्छ
फेरि एकपल्ट भ्या भ्या गरेर शहर थर्काउनु पर्छ
चाड मनाउनु पर्छ
कम्मर मर्काउनु पर्छ
झीरमा उनेर राती अबेरसम्म सेकुवा बनाउनु पर्छ
विदेशी रक्सीको मातमा
आफ्ना भाषा संस्कृति सबै बिर्सिएर
विदेशी गीत गाउनु पर्छ
आफ्नै स्वाभिमान लुछ्नु पर्छ
राष्ट्रियताको टालोले मुख पुछ्नु पर्छ
दशैं आएछ ।

०००
गौरादह, झापा