नेपाली हास्यव्यङ्ग्य अनलाइन पत्रिका

(हिजोसम्म देखिएको
वास्तविकता यस्तै थियो
आगामी दिन यस्तो नहोस् ।)

सवै थोक खानु भन्दा अगाडि
सपथ खानुपर्छ ।
सपथ खाइसकेपछि
जे खाए पनि हुन्छ ।

बग्दै गरेका कोशी गण्डकी
तन्तनी खाए हुन्छ
चुरे चारकोसे पहाड, जङ्गल
सवै चपाए हुन्छ ।

एक लाइन भाषण गर्न
लाखौंको हेलिकप्टर उडाए हुन्छ
एक तुर्को रक्सी प्यून
सयौं मोटर गुडाए हुन्छ ।

हो हजुर !
यहाँ सपथ खाएपछि
जे खाए पनि हुन्छ ।

चोरलाई चौतारो र साधूलाई सूली हुने देशमा
सडकको अलकत्रा
मिठो भान्सा बनाए हुन्छ ।

यहाँको पुलको पैसाले
छोराछोरी बिदेश पढ्न पठाइ
आफूलाई आदर्श नेता जनाए हुन्छ ।

कर्मचारीको सलोट खाए हुन्छ
निर्माणको ढलोट खाए हुन्छ
तमोर कावेली, मादी मस््र्याङ्दी
सवै सवै खाए हुन्छ
यहाँ सपथ खाएपछि
जे खाए पनि हुन्छ ।

भ्रष्टाचारी शर्मा र बर्मालाई
न्यायको सफाई दिलाउन
नगदको लक्कुर खाए हुन्छ ।
सरकारी उद्योग धन्दा समाप्त पारी
स्वदेशी अर्थतन्त्रलाई
उँधै धपाए हुन्छ ।

आखिर तपाईंको पनि भविष्य
युरोप अमेरिका भएपछि
यो देशलाई च्याते हुन्छ, चपाए हुन्छ
किनकि
सपथ खाएपछि,
जे खाए पनि हुन्छ ।

ज्वाईंलाई ठेकेदार
भान्जालाई भन्सार जिम्मा लाए हुन्छ
देशभक्तिको देखावटी गीत
सभा समारोहमा गाए हुन्छ ।

हो हजुर !
सवैभन्दा पहिला, सपथ खानुहोस्
सपथ खाएपछि
जे खाए पनि हुन्छ ।

०००
गौरादह, झापा