नेपाली हास्यव्यङ्ग्य अनलाइन पत्रिका

‘ह’ महिमामा ‘हस् र हजुर’को कमाल तपाईंले पक्कै पढ्नु भयो होला ।
हस् र हजुर अति जीवन उपयोगी सुत्र हो । घर, गृहस्थमा हस् को महत्व मैले फेरि दोहराउन नपर्ला, त्यस्तै घर बाहिर हजुरको नुस्खाले जीवनमा अगाडि बढ्न सहयोग गर्छ । यो पनि व्याख्या गरिरहन नपर्ला । अब हँसिलो ‘ह’मा आकार थपेर हा बनाउनुस् । हो, यो ‘हा’मा हा थपेर हा हा बनाउनु भयो भने यसले सबैलाई हँसाउँछ । सबैलाई खुसी तुल्याउँछ । हा हा घुमाउरो पारामा उपदेश दिनलाग्यो भन्ठान्नु होला, त्यो हैन है साथीहरू ।

म कुरा गर्दैछु, ‘हा’मा व आकार थपेर बन्ने ‘हावा’को । यो त झनै जीवनको पलपलमा नभई नहुने तत्व हो, पंच तत्वमध्ये एक । तपाईंको चुच्चे, थेप्चे, बुच्चे वा डल्ले नाकले यो हावा तान्न बिर्सियो भने, तान्न सकेन भने तपाईं ‘तुम् पाकु छ्याइँ’ हुन पुग्नुहुन्छ, यानेकि तपाईं मास छर्न जानुहुन्छ ।

यो हावा नाकबाट भित्र पसेर फोक्सोतिर पसे त ठीकै छ, कथम् कदाचित् भुँडीतिर रुमलियो भने, अरुलाई त केही हुन्न तपाईं आफैलाई भने तिरिमिरी झ्याइँ पार्छ । अमिताभ बच्चनवाला हाजमोला खाउँ कि रामदेववाला हिङगोली खाउँ पार्छ । खानै परेपछि भने, सिंहदरबार बैद्यखानाको पाचक खानुहोला । आलु खानु होला, अण्डा खानु होला, लड्डु खानुहोला तर हावा नखानु होला, त्यो चाहे जाँचमा होस् वा जीवनमा ।

त्यो हावा तपाईंको पेटमा बसेसम्म त कसैलाई केही छैन । तर, तपाईंको निकासबाट निस्कियो र अरुको नाकतिर आगमन गर्‍यो भने आपत् पार्छ । त्यस्तो बेला कसैले ‘को हो यो वायु पिचास ?’ भन्यो भने यस्तो परिस्थितिमा ‘म हैन’ भनी हाल्नुपर्छ । यदि तोप पड्केजस्तो पड्केर निस्कियो भने त्यसो भन्ने मौका पनि पाउनु हुन्न । त्यसैले हावालाई वायु नबनाउँ, बन्ने मौका नदिउँ । साथै ‘शरीरमा वायु बढ्यो भने आयु घट्छ’ यो सूत्र पनि जानिराखौँ ।
अनि, पेटको वायु तल हैन माथि लागेर मुखबाट निस्कियो भने अर्को बिजोग । मुखभन्दा अझ माथितिर लाग्यो भने ? फेरि दिमागसम्म पुगेको हावा फुस्स फुस्कियो भने ? अब, अरु नबोलौँ, त्यतातिर लाग्दै नलागौँ ।

कहिलेकाहीँ के हुनसक्छ भने, तपाईंको हावा यानेकि आयु वायु ठीक छ तर तपाईसँग उठबस गर्ने नजिककाहरू, चम्चाहरू, काँटाहरू हावादारी हुनसक्छन् । यहाँ पनि होस पुराउनु पर्छ । त्यस्ता हावा मान्छेहरूसँग होसियार रहनुपर्छ । त्यस्ताले कतै तपाईंलाई हावा भरेर ‘वाह वाह’ गरेर यत्तिकै फुलाउन खोजेको त छैन, हेक्का राख्नुपर्छ । बेलुन फुलाएजस्तो फुलाएर फ्याट्ट फुटाउन बेर छैन, याद गर्नुहोला ।

टोल छिमेकका मानिसहरूसँग त तपाईं होसियार हुनुहोला, तर देशको छिमेकीले दुःख दिन चाहे भने दक्षिणबाट तातो लू र उत्तरबाट चीसो सिरेटो पठाई दिनसक्छन् । हावाको गति अलि बढाई दिए पुग्छ उनीहरूलाई । अनि हावा हुरीमा बदलिन्छ, आँधीवेरीमा बदलिन्छ । अनि उत्पात् मचाउन थाल्छ, त्यो भुमरीमा बदलियो भने थप विपद् थप्छ । त्यसैले सँगैकासँग सतर्क रहनु पर्छ ।

तर, पहाडको त्यो चौतारीमा सुस्ताउँदा चिसो चिसो बतास सुस्तरी चल्यो भने ‘यो हावा, यो लहर यो रमझम तिमीलाई, रेलिमाइ रेलिमाइ, रेलिमाइ’ गाउन मन लाग्छ । ‘चिसो चिसो हावामा त्यसै मन बरालिन्छ’ गाउन मन लाग्छ । मखुला पासा ?

अन्तमा हनुमानजीका पिता पवन देव, वायु देवतालाई मेसेज पठाएर एउटा अनुरोध गर्न पाए हुन्थ्यो भन्ने लागेको छ । अनुरोध के भने, एउटा ठूलो बबन्डर हावाहुरी, आँधी देशमा पठाई दिनु पर्‍यो, त्यो आँधीबेहरीले देशका बुढाखाडा, पातकी नेताहरूलाई देशको राजनीतिबाट बढारेर लगोस्, उडाएर लगोस् । गणतन्त्रमा यस्तो अनुरोध गर्न मिल्ला कि नमिल्ला, साथीहरू ? ठीक अनुरोध गरेँ हैन त ? मखुला पासा ?

०००
यु.एस. ए.