नेपाली हास्यव्यङ्ग्य अनलाइन पत्रिका

बुढो भैसकेँ फेरि बच्चा भएर
गरूँ के गरूँ भो हिजो बिर्सिएर
लिई हातमा नोटका आज थैला
समातूँ ? अँगालूँ ? कतै हुन्न हल्ला ??

बढ्यो देशमा शक्तिको होडबाजी
गरेका गर्‍यै छन् सबै भाइ-दाजी
मलाई नछोड् भन्दछन् ज्योतिषीले
कहाँ छोड्छु सित्तै म आफ्नै खुसीले !!

म आए नराम्रो हुने नै छ के र ?
नआएर राम्रो भएको छ के र ?
चलेकै छ जो देशको मालगाडी
सही लक्ष्य गन्तव्यको मार्ग छाडी !!

युवा काँधमा चढ्न खोज्छन् तुरुन्तै
बुढा बोक्न सक्ने कहाँ छन् दुरुस्तै
सबैमाथि भारी भएको म नै हुँ
र सत्ता शिकारी भएको म नै हुँ !!

पुगेँ चार कोरी बुढो के भएँ म ?
बनेँ झन् अघोरी कतै खै गएँ म ?
सकेको गरून् गर्न सक्ने सबैले
हटाऊन् सकेमा मलाई कसैले !!

विना र्‍याल जिब्रो कहाँ नाँच्न सक्छ ?
सिँगानैविना नाक के बाँच्न सक्छ ?
म र्‍याले सिँगाने भनून् भन्नलाई
म छाड्ने छिटै छैन यो शक्तिलाई !!

०००
मेचीनगर, झापा
हाल अमेरिका