सत्ता घुम्यो फन्फनी
झुट्टा जो नखरा गरेर पदको खायौ सबै कुञ्जिनी धर्तीको सहकाल बेच्न सहसा सङ्घीयता मोहिनी तानातान भयो कुवेर भरिया छिन्ला कतै कन्दनी काटाकाट यता मदान्ध बलमा सत्ता घुम्यो फन्फनी ।
सत्ताका मतियार जो गणक छन् मातेर भो सन्सनी
पाए लुट्न भने तयार सजिलै बन्छन् भलायो पनि
हावाताल गरी भकुर्न हलिया हिंड्छन् सदा निर्धनी
पाँडेचाल चलेर यो मुलुकमा सत्ता घुम्यो फन्फनी ।१
यी भष्मासुर हुन् भयानक हुने आधार गुम्दा पनि
भ्रष्टाचार कुचाल हो अवनिको फड्के नचल्दा पनि
पापाचार गरेर गुहार्न सकिने मुर्दा नबोल्दा पनि
पाँडेचाल चलेर यो मुलुकमा सत्ता घुम्यो फन्फनी ।२
कुर्सीमा रमणी धरा नलुट यो कुमार्ग लागे पनि
हाम्री यी धरणी गरा नजुट है पाताल बासी पनि
छिर्केदाउ गरे सधैं भरणको बालेर आगो पनि
पाँडेचाल चलेर यो मुलुकमा सत्ता घुम्यो फन्फनी ।३
गर्दैछौ करणी जहाँतक मिली दुष्कर्म जान्दा पनि
भर्दैछौ धनले नियामक बनी झोली भयो टन्टनी
कालो यत्न गरी धनी कहलियौ नाच्यौ बनी नन्दिनी
पाँडेचाल चलेर यो मुलुकमा सत्ता घुम्यो फन्फनी ।४
बौलाहा सुरमा भयो खलबली सत्ता नमिल्दा पनि
तिम्रो मन्द छ तामझाम खलियो बल्दै गयो दन्दनी
आमाको ममता हराइरहने धिक्कार यस्तो जुनी
पाँडेचाल चलेर यो मुलुकमा सत्ता घुम्यो फन्फनी ।५
झुट्टा जो नखरा गरेर पदको खायौ सबै कुञ्जिनी
धर्तीको सहकाल बेच्न सहसा सङ्घीयता मोहिनी
तानातान भयो कुवेर भरिया छिन्ला कतै कन्दनी
काटाकाट यता मदान्ध बलमा सत्ता घुम्यो फन्फनी ।६
०००
चितवन