नेपाली हास्यव्यङ्ग्य अनलाइन पत्रिका

१.
देशको श्रोत साधन देख्नैहुन्न, लुट्न मन लाग्छ
हिमालदेखि तराई सबै, धुत्न मन लाग्छ
नेता भएको फाइदा यस्तै भयो जनता ओझेलमा
प्रतिस्पर्धी बन्नुभन्दा आफ्नैसँग, फुट्न मन लाग्छ ।

२.
बेचिने यहाँ गुमनाम छ
बेच्नेको इतिहासमा नाम छ
भाइ-भाइको झगडा चर्केको छ
त्यसैले त देश बदनाम छ ।

३.
कृषि प्रदान देश हाम्रो,कृषक रोइराछन्
लागतभन्दा कम मूल्यमा, बस्तु बेचिराछन्
श्रमको मूल्य कदर गरियोस् कृषकको आवाज
कानमा रुवा ठोस्दै नेता, सदन चलाइराछन् !!

४.
पातमाथि फुल्ने फूलको, जात धेरै हुँदारैछन्
आज एउटा भोलि अर्को, बात धेरै हुँदारैछन्
सर्वहारा भन्दा पनि सरमहारा बढ्दै गएपछि
देखाउने भन्दा यहाँ लुकाउने हात धेरै हुँदारैछन् ।

०००
रोतोपुल, काठमाडौं