नेपाली हास्यव्यङ्ग्य अनलाइन पत्रिका

नलेख्ने कुरा जे थिए लेख्न थाले
यिनैमा भलो यी सबै देख्न थाले
पचाई सबै लाज लेख्छन् तमास
बिगारे यिनैले कठै यो समाज ।

नढाँटी समाचार भन्छन् हुँदैन
झुटोकै छ चर्चा र साँचो छुँदैन
तितो सत्यलाई सधैँ छोप्न खोज्छन्
निराधार बाटो त्यसै हिँड्न रोज्छन् ।

कुनामा बसी यी सबै थोक देख्छन्
घरैमा बसी झन् समाचार लेख्छ्न्
अनायास चर्का कुराका प्रपात
थुपार्छन् अनेकौं विकामे विवाद ।

दुराचार बाँडी सदाचार भाँड्छन्
सधैँ तीव्र हल्ला गरी मात्र ढाँट्छन्
भए सूक्ष्म जुम्रो यिनै सिंह पार्छन्
जता हुन्छ पैसा त्यतै ती चहार्छन् ।

भए श्लील सस्ता छुसी पत्रुकार
इमानी भएनन् बने घाँस झार
सबै देख्छु छाडा बिभिण्डा हरामी
यिनैले धरा यो बनाए खरानी ।

०००
दमक ८, झापा