नेपाली हास्यव्यङ्ग्य अनलाइन पत्रिका

वरपर गणिका छन् थुन्छ कोही गरालो
छलफल हुलका छन् खान खोज्ने बिरालो
दलबल खलका छन् जान खोज्छन् उकालो
टिलपिल किन सत्ता गर्छ कस्को धरालो ।१

धन र महल ताक्ने तुच्छ स्वार्थी छ कालो
करमकरम पार्छन् दुष्ट ताना छ मैलो
सुटुसुटु तह पार्छन् भ्रष्ट पारा छ थैलो
टिलपिल किन सत्ता गर्छ कस्को धरालो ।२

रजगज ढिकुटीमा स्वाद फेर्ने छ पालो
रनवन सुकुटीमा खान मार्सी छ पालो
कपट छ चकटीमा राजधानी छ डालो
टिलपिल किन सत्ता गर्छ कस्को धरालो ।३

गडबड सब गर्दै राज्य सत्ता करालो
तलतल शिर झुक्दा छैन लज्जा छ गालो
तहसनहस पार्दै देश बेच्छन् तगालो
टिलपिल किन सत्ता गर्छ कस्को धरालो ।४

दिगमिग सपना झैं लाग्न थाल्यो तुवाँलो
रिमझिम गहना झैं भाग्न थाल्यो बियाँलो
खलदल भरियाको घेर्न थाल्यो निगालो
टिलपिल किन सत्ता गर्छ कस्को धरालो ।५

दलन दमन गर्ने चोर सत्ता अँगालो
कहर कलुष दाता धुन्धुकारी सँगालो
हर प्रहर कलोमा भुल्न थाल्छन् छ जालो
टिलपिल किन सत्ता गर्छ कस्को धरालो ।६

०००
चितवन