नेपाली हास्यव्यङ्ग्य अनलाइन पत्रिका

लुट्छन् र खान्छन् किन डम्म हुन्नन् ?
यी दुष्ट थुम्का किन सम्म हुन्नन् ?
यी भ्रष्टमा एक समानता छ
खोज्दैछु खै नैतिकता कता छ ?

सन्सारको माथ म नै छु भन्छन्
यो राष्ट्रको साथ सँगै छु भन्छन्
बोली सुनौलो त जता तता छ
देखिन्न खै नैतिकता कता छ ?

खोला बिनाका पुल बन्न थाले
शिक्षा बिनाका स्कुल चल्न थाले
गन्तव्य यात्रा बिच भिन्नता छ
भेटिन्न खै नैतिकता कता छ ?

आश्चर्य लाग्ने किन काम गर्छन्
आश्चर्य लाग्ने किन दाम चर्छन्
पीडा अनौठो ननिको व्यथा छ
आश्चर्य खै नैतिकता कता छ ?

ढाँटेर जो काम सुटुक्क गर्छन्
हल्लाउँदै हात मुसुक्क गर्छन्
हेरेर बस्ने जनता यता छ
खोज्ने छ को नैतिकता कता छ ?

सम्पन्नताको परिकल्पनामा
हाम्रो गयो जीवन बाध्यतामा
नेताहरूमा त प्रसन्नता छ
को छन् हुने नैतिकता कता छ ?

०००
मेचीनगर, झापा
हाल- बेलायत