नेपाली हास्यव्यङ्ग्य अनलाइन पत्रिका

नर्थ क्यारोलाइना, मे १४, २०२३ । अमेरिका भ्रमणमा रहनुभएका वरिष्ठ साहित्यकार तथा संस्कृतिविद प्रा तुलसी दिवसको सम्मानमा नर्थ क्यरोलाइनाको केरी स्थित हिमालयन ग्रिल रेस्टुरेन्टमा एक साहित्यिक साँझको आयोजना गरियो ।

नर्थ क्यारोलाइना नेपाली साहित्य समाज तथा अन्तर्राष्ट्रिय साहित्य समाज नर्थ क्यरोलाइना च्याप्टरको आयोजनामा भएको उक्त कार्यक्रममा प्रा.अच्युत शर्माले साहित्यकार तुलसी दिवसको परिचय दिँदै उहाँ नेपाली साहित्य र संस्कृतिको उत्थानमा योगदानको आधारमा एक व्यक्ति अनेक व्यक्तित्वको रुपमा रहेको बताउनुभयो ।

कार्यक्रमका मुख्य आकर्षण प्रा तुलसी दिवसले नेपाली साहित्यको वर्तमान स्थिति, नेपाली साहित्य र संस्कृतिको संरक्षण, विकास र अन्तर्राष्ट्रियकारण गर्न आफूले खेलेको भूमिका, प्रवासमा बस्ने नेपालीको यसमा हुन सक्ने योगदान आदि विषयमा विचार उत्तेजक र प्रेरक मन्तव्य राख्नुभएको थियो । उहाँले आफ्ना केही कालजयी कविताहरू पनि सुनाउनुभएको थियो ।

कार्यक्रमको दोस्रो चरणमा नर्थ क्यारोलाइना निवासी साहित्यकारहरू नीलम कार्की निहारिका, डा ऋषि बस्ताकोटी, लोककवि सुरेशकुमार भट्ट, प्रभा पोख्रेल, डा. शरद पराशर, दिजा पाण्डे, गुन्जना न्यौपाने, सुबोध पौडेल लगायतले आ-आफ्ना रचना वाचन गर्नुभएको थियो ।

उक्त अवसरमा नव उपन्यासकार नितिन मिश्रको उपन्यास ‘म र म’ को गृह लोकार्पण पनि गरियो । डा. ऋषि बस्ताकोटीले श्रष्टाको परिचय दिनुभएको थियो भने वरिष्ट साहित्यकार प्रा. तुलसी दिवस, नीलम कार्की निहारिका र नर्थ क्यारोलाइना नेपाली साहित्य समाजका अध्यक्ष शिशिर खनालले पुस्तकको लोकार्पण गर्नुभएको थियो ।

विमोचनपछि वरिष्ठ साहित्यकार प्रा.तुलसी दिवसले नवसर्जक मिश्रलाई बधाई दिँदै साहित्यिक लेखनमा निरन्तरताको शुभकामना दिनुभएको थियो ।

करिव साढे दुइ घण्टा रोचक प्रस्तुतिका साथ् चलेको कार्यक्रमको उद्घोषण साहित्यकार नम्रता गुरागाईंले गर्नुभएको थियो भने अध्यक्षता नर्थ क्यारोलाइना नेपाली साहित्य समाजका अध्यक्ष शिशिर खनालले गर्नुभएको थियो ।

निर्मला राजभण्डारीले अतिथि तथा उपस्थित सबैलाई स्वागत गर्नुभएको थियो । कार्यक्रमका अतिथि नायक प्रा तुलसी दिवसलाई आयोजकका तर्फबाट मायाको चिनो समेत प्रदान गरिएको थियो । कार्यक्रममा नर्थ क्यारोलाइनाका स्थानीय साहित्यकार, साहित्यानुरागी र संघसंस्थाका प्रतिनिधिहरूको बाक्लो उपस्थिति थियो ।

०००