नेपाली हास्यव्यङ्ग्य अनलाइन पत्रिका

दुष्यन्त भट्टराई :

जन्मी छिमेकतिर आज सुटुक्क आई
खोज्दैछु नागरिकता अब किन्नलाई
छन् रे बजार सजिलै सबथोक मिल्ने
छैनन् विदेशतिरको अनुहार चिन्ने !!

नाता प्रमाणित नहोस् डर छैन कत्ति
पैसा छ साथ यदि ता सब मिल्छ जत्ति
के भो र नागरिकता जब किन्न पाएँ
ढाँटेर आज यसरी म यता रमाएँ !!

मेरो छ नागरिकता भन किन्छ कोही ?
ढुङ्ग्रो छ लाज अब मान्दिन माग्न मोही
बेचेर जान्छु सजिलै म विदेश ताकी
व्यापार गर्छु अब यो मुलुकै नराखी !!

गोजी भरेर धनले अब विश्व घुम्छु
कैदी छ नागरिकता म स्वतन्त्र हुन्छु
सस्तो छ दाम अब बेच्न बजार आएँ
बेचेर नागरिकता धन यो कमाएँ !!

वाधा विरोध जति नै गरियोस् ममाथि
पार्टी छ साथ अगुवा मतियार साथी
मुद्धा परोस् कि नपरोस् बुझ भोलि पर्सी
फत्ते तमाम अब काम गरूँ नतर्सी !!

आफ्नै छ भाइ भतिजो प्रहरी बनेको
झन् माथिबाट सहयोग रहोस् भनेको
पक्रेर आज लगिए म छिटै लतार्छु
मेरा विरुद्ध जति छन् म अचार पार्छु !!

०००
मेचीनगर, झापा
हाल- बेलायत