नेपाली हास्यव्यङ्ग्य अनलाइन पत्रिका

देवीप्रसाद मिश्र :

छर्दै कलाका अनमोल भ्रान्ति
गर्दा धरामा दिनरात क्रान्ति
जन्मेर नौलो गणतन्त्र आयो
सन्त्रास मात्रै अझ झन् पलायो !!१!!

पाले बसेका कति आज ढाडे
छन् साथ त्यस्तै मदमत्त साँढे
भन्छन् सदा लाग्दछ मात्र भोक
सिध्याउने झैँ घर गोठ चोक !!२!!

हुर्केन हाम्रो गणतन्त्र आज
चिन्ता व्यथामा छ सबै समाज
बोक्सी बनेका कति छन् सुसारे
रक्सी नसामा अझ मस्त पाले !!३!!

आमा रुँदै छिन् खुन पोखरीमा
बच्चो लुकाए पर टोकरीमा
सारा युवाको छ विदेश बास
पाका भुरा छन् घरमा निराश !!४!!

मेची र काली अघि मैलिएका
छैनन् यहाँ खै अझ सङ्लिएका
सीमा अनेकौँ तल हल्लिँदै छन्
हैमादि अग्ला चुचुरा रुँदै छन् !!५!!

फुल्दै गरेका नवरत्न गाभा
भागीरथी उज्ज्वल निर्मलाका
यी सत्यका तथ्य कता हराए
साँढे र ढाडे जहिल्यै रमाए !!६!!

चोरेर खाने घरभित्र ढाडे
वगान मास्ने मनमत्त साँढे
जन्मेर मात्रै गणतन्त्र आयो
आशा हराएर निराश छायो !!७!!

०००
ताप्लेजुङ, हाल- काठमाडौ
२०८०/२/११