नेपाली हास्यव्यङ्ग्य अनलाइन पत्रिका

चन्द्रमणि अधिकारी :

१.
हाँक्ने इच्छा मजबुत भयो पार्न साहित्य चोखो
पारेको हो अचम कविले शब्दको आज पोको
नेपालीको मन वचनको साधना दिव्य चर्को
आओस् पाओस् सुगम महिमा शान्तिको ओढ्न बर्को ।

२.
नेपाली हो घर घर उठी निस्क नेतृत्व घेर्न
इच्छा हो यो उचित कविको दासता जो नटेर्न
वैरी साम्ने यस मुलुकको नुर मान्दैन झुक्न
नेता बिक्ने फगत रुपियाँ साथ चाला छ चुक्न ।

३.
ढुङ्गा माटा पनि मुलुकका उठ्दछन् झारपात
भन्छन् घाती सब किसिमका खेद्न चाहिन्छ आँट
हावापानी पवन अहिले उठ्न थाले खिलाफ
जो जे गर्छन् नियत ननिको राष्ट्रको बर्खिलाफ ।

४.
नेपालीको तन मन उसै पार्दछन् आज दिक्क
गर्जून् निस्की युवक युवती हाँक्न नेपाल ठीक्क
आफ्नो अर्को अब सब जनता मान्न मान्दैन नेता
जस्ले गर्दा अविचल रहोस् फर्फरी राष्ट्र झण्डा ।

५.
फाँसी ठोक्ने जति जति बने भ्रष्ट सारा निकम्मा
माटो पानी सरहद गुम्यो, राष्ट्रको यो अवस्था
पारेका हुन् कपट शठले राष्ट्रको पूर्ण हानी
आओस् चर्को अब लहरमा भ्रष्ट मास्ने सुनामी ।

०००
२०८०/०२/२४, बिहान
तनहुँ, नेपाल ।