नेपाली हास्यव्यङ्ग्य अनलाइन पत्रिका

तिलकराज पौडेल :

साडीले संक्षेपीकरण गर्दै मिनी स्कट बनेछ ।
अपाङ्ग इस्टकोट अतास्सिदै आईलभ यू भनेछ
सुरूवालले आत्महत्या गर्न इँजार टनटनी कसेछ ।
उलन सटले थाहा पाई म्याक्सीलाई दुई चड्कन कसेछ ।
नारी दमनको बिरूद्धमा ब्लाउजको बैठक बसेछ ।
ठीक त्यसैवेला कालोटोपी अनुगमन भनेर पसेछ ।
धरधरी चिरिएको पिरले कुर्था मुर्छा परिछन् ।
पारदर्शिताको ध्वाँस दिँदै सल अलि तल झरिछन् ।

उता मोजा सुरक्षा खोज्दै कालो बुटको खोजीमा
पाएल चप्पल टुलुटुलु हेर्छ ।
तनेभोटो पसिना चुहाउँदै सुईअ सास फेर्छ ।
दौरा सुरूवाल सिंहदरवारतिर
कोटले चलाखी खेलेछ ।
कहिले सट कहिले सुट गोरो टाईले एमसिसी पेल्छ ।
गलबन्दीको मात्र हैन हजुर छत्रे टोपीको पनि खेल छ ।

छिमेकी पाईजामा लिपुलेक जोत्छ ।
के हेरेर बस्याछस् ढाकाटोपी भनेर चाङ्ची सोध्छ ।
सेण्डो गन्जी भित्रभित्रै मुरमुरिन्छ कट्टु जिल्ल पर्छ ।
पकेट रूमालले शान्ति शान्ति भनेको कल्ले सुन्ने गर्छ ।
नङपालिसको अव्यवहारिक आरक्षण
पेटीकोटको तेत्तिस पर्सेन्ट
गणतन्त्रले ढपक्क ढाक्दा
संसद हलमा कुर्ची उठ्दा चुरा फुट्दा
लिपिस्टिक मुसुक्क हांस्छन् ।
फरिया चोली दोहोरीतिर
हिल जुत्ताले पिरथी गाँस्छन् ।

बिचरा कछाड घलेकको खोजीमा सुईअ सास फेर्छ ।
जमाना समानुपातिकको भयो हजुर
जाबो इष्टकोटको उर्दी कसले टेर्छ ?

०००
रत्ननगर, चितवन