नेपाली हास्यव्यङ्ग्य अनलाइन पत्रिका

के.पी.पौडेल :

काण्ड नै काण्डका योजना रच्दछन् ।
झेलका पापका पोखरी खन्दछन् ॥
रङ्गका भेदका छन् यहाँ रौरव ।
धूर्तका चालले जुट्दछन् मानव ॥
१

उच्चको सानमा मानमा पुग्दछन् ।
देशको मर्ममा वाणले रोप्दछन् ॥
चण्डझैँ मुण्डझैँ कंसझैँ छन् सब ।
धूर्तका चालले जुट््दछन् मानव ॥
२

मानको लाभको गर्दछन् वणर्न ।
देशको सानको गर्छ को रक्षण ?॥
राष्ट्रका स्थानमा गिद्धझैँ छन् सब ।
धूर्तका चालले जुट्दछन् मानव ॥
३

जुट्दछन् रम्दछन् गर्दछन् बैठक ।
देशको मर्ममा थप्दछन् सङ्कट ॥
मेलको युक्तिको गर्छ को पौरख ?।
धूर्तका चालले जुट्दछन् मानव ॥
४

देशको मर्दको खेद्छन् बाहिर ।
साधुका भेषमा बन्दछन् बर्बर ॥
देशको शक्तिको हर्दछन् गौरव ।
धूर्तका चालले जुट्दछन् मानव ॥
५

स्वर्गका मर्त्यका दिक्क छन् पूर्वज ।
उग्र छन् कालझैँ आजका मानव ॥
वीरका त्यागको व्यर्थ भो पौरख ।
धूर्तका चालले जुट्दछन् मानव ॥
६

०००
बट्टार, नुवाकोट । हालः- बालाजु, काठमाडौं
मोबाइल नं. ९८४१७५८१८४