बिन्दु दहाल ‘मूकदर्शक’कोही छन्
साला ज्वाइँ दिदी भिनाजुतिरका पोस्नेहरू छन् यहाँ, आफ्नै यो घरमा लुकी अनल पो झोस्नेहरू छन् यहाँ, झुप्रो नै नहुने सधैँ सडकमा सुत्नेहरू छन् यहाँ, डाँका झैँ दिउँसै निरीह जनता धुत्नेहरू छन् यहाँ ।
बिन्दु दहाल मूकदर्शक :
कोही छन् अधिकारका मखमली नारा उराल्ने यहाँ
कोही छन् हतियारले गगनका तारा खसाल्ने यहाँ
जे जे गर्न सकिन्न गर्छु म भनी ठग्नेहरू छन् यहाँ
कोही मस्त उखानमा मनपरी बग्नेहरू छन् यहाँ ।
मेरो छैन भुँडी म खान्न घुस त्यो भन्नेहरू छन् यहाँ
बोरामा रुपियाँ लगी मुलुकको गन्नेहरू छन् यहाँ
कोही त्यो ललिता निवासतिरका छन् कर्मचारी पनि
नेता नै मतियार आज यसका छन् छद्मधारी पनि ।
कोही सांसद ती पुगी सदनमा उङ्नेहरू छन् यहाँ
बाटामा तरुनी र नर्तकहरू रुङ्नेहरू छन् यहाँ
कोही हल्लुड छन् सधैँ गफ चुटी थाङ्ने कुरा गर्दछन्
कोही देश चलाउँछौँ डलर पो माग्ने कुरा गर्दछन् ।
उल्टाई विधि नै अदालत दिसा गर्नेहरू छन् यहाँ
साँढेझैँ हरियो सधैँ छल गरी चर्नेहरू छन् यहाँ
प्रायः आँसु पिई रुँदै धरधरी मर्नेहरू छन् यहाँ
भ्रष्टाचार गरेर लुक्न दल नै फेर्नेहरू छन् यहाँ ।
साला ज्वाइँ दिदी भिनाजुतिरका पोस्नेहरू छन् यहाँ
आफ्नै यो घरमा लुकी अनल पो झोस्नेहरू छन् यहाँ
झुप्रो नै नहुने सधैँ सडकमा सुत्नेहरू छन् यहाँ
डाँका झैँ दिउँसै निरीह जनता धुत्नेहरू छन् यहाँ ।
०००
दमक, झापा
Subscribe
Login
0 Comments
Oldest
