नेपाली हास्यव्यङ्ग्य अनलाइन पत्रिका

खगेन्द्र नेउपाने :

ए छिमेकी !
तिम्रो कुकुर रातभरि करायो
मेरो निन्द्रा रातभरि हरायो
तिम्रो निकम्मा सोखको लागि
मेरो अमूल्य सपनाको बली चढाउनुपर्ने ?

तिमी मात्रै होइन
तिम्रो त्यो कुकुर पनि मापाको रहेछ
ठ्याक्कै तिम्रै जुठो खाको रहेछ
भलादमी कर्मचारी नेता भेटे पाउमा जाँदोरहेछ
सोझा साझा झुत्रे झाम्रे निर्धा निमुखालाई
बार्दलीबाटै सात्तो खाँदोरहेछ
तिम्रो स्वोर चिन्छ तर चोर चिन्दैन
बलिया पाखुरालाई पुच्छर हल्लाउँछ
तर कमजोर चिन्दैन

ए छिमेकी तिम्रो त्यो कुकुर ?
तिम्रो अहमको प्रतिबिम्ब
तिम्रो नवधनाढ्य सानको परिचायक
मेरो कमजोर घरको भित्ता चर्किनेगरि
मेरो अभावमा बाँचेको मुटु थर्किनेगरि
भुकिरहन्छ रातभर
तिम्रो निकम्मा सोखको लागि
मेरो अमुल्य सपनाको बली चढाउँनु पर्ने ?

०००
गौरादह, झापा