नेपाली हास्यव्यङ्ग्य अनलाइन पत्रिका

खगेन्द्र नेउपाने :

मैले तपाईंको अन्तर्वार्ता हेरेँ नि !
कति मिठो अभिनय
अभिनेता र नेता उस्तै लाग्ने गरी
कति नढाँटिकन ढाँटेको
कति नछलिकन छलेको
मैले तपाईंको अन्तर्वार्ता हेरेँ नि !

कति चट्ट पर्नु भा को पनि
कति झट्ट गर्नु भा को पनि
नेपाली खाँडीको दौरा सुरुवालभित्र
पराया मुटु कति राम्ररी छोप्नु भा को
शब्दका छद्मभेषी सुईराहरूले
राष्ट्रिय मर्महरूमा नजाँनिदो रोप्नु भाको
मैले तपाईंको अन्तर्वार्ता हेरेँ नि !

कुटिल मुस्कानको नजानिंदो पाराभित्र
बटुलिएका शब्दका सारगर्भित इसाराभित्र
हामी पछारिएको नमिठो अनुभुतिको स्वाद पिएर
भविष्यका कहालीलाग्दा सन्त्रासहरू लिएर
टेलिभिजनको पर्दाअघि ऐठन मिश्रित श्वास फेरेँ नि
मैले तपाईंको अन्तर्वार्ता हेरेँ नि !

हजुर ! तपाईं त आफैं बन्नुभाको होइन रहेछ
अरुले नै सिकाइदिएको
आफैंले नै त भन्नुभाको होइनरहेछ
एउटालाई धम्की दिन अर्काको नाम लिनुहुन्छ
स्वार्थको पसारा पोखी जोसँग नि काम लिनुहुन्छ
भन्नलाई त आफूलाई समाजवादी भन्नुहुन्छ
बन्न चैं सँधै माझवादी बन्नुहुन्छ
यता पनि ठिक्क उता पनि ठिक्क
धेरैपल्ट फुस्किएको इँजार
बाँध्दा बाँध्दै कति भैसके दिक्क
अभिशप्त आशंकाहरूले आफैंलाई बेरेँ नि
मैले तपाईंको अन्तर्वार्ता हेरेँ नि !

०००
गौरादह, झापा