नेपाली हास्यव्यङ्ग्य अनलाइन पत्रिका

खगेन्द्र नेउपाने :

जीवनको अस्ताचलमा पुग्नुभएका
श्रद्धेय नेताजीलाई सोधें
अन्तिम इच्छा के छ हजुर !
वहाँले थर्थराउँदै भन्नुभो
माला मञ्च र माईक ।

ठेकदार व्यापारी र कर्मचारीको टिकटमा
विदेश भ्रमण गर्नेहरूलाई सोधें
तपाईंको पावर के छ हजुर !
वहाँले छाती फुकाउँदै भन्नुभो
माला मञ्च र माईक ।

राजनीतिको पहिलो यात्रामा
पाइला राखेको युवालाई सोधें
तपाईंको लक्ष के हो ?
उनले दृढ हुँदै भने
माला मञ्च र माईक ।

देशको चिन्ता गरिरहेको
एउटा नागरिकलाई सोधें
देशको अग्रगमनको बाधक के हो ?
उसले निधार खुम्च्याएर दिक्क हुँदै भन्यो
माला मञ्च र माईक ।

०००
गौरादह, झापा