विरोध
आकाशमा कालो बादल देखेर कुना कुनामा कालो झण्डा बोकेका मान्छेहरू पानी परे पनि पानी नपरे पनि विरोधको तयारी गर्दैछन् पानी परे बिस्कुन भिज्ने जग्जगी पानी नपरे बाली सुक्ने जग्जगी ।
खगेन्द्र नेउपाने :
छोरीको फर्माइसमा
युरोप भ्रमण गरेर फर्किएका
अधिकारी सरले
ड्युटी फ्रीमा ल्याएको रेड लेवलको
एक तुर्को पिएर
आँगनमा लर्बरिंदै उभिएको
बट्टाइ माइला जस्तो
माझ आकाशमा किंकर्तव्यविमुढ भएको छ
एक टुक्रा कालो बादल ।
कुना कुनामा कालो झण्डा बोकेका मान्छेहरू
पानी परे पनि, पानी नपरे पनि
विरोधको तयारी गर्दैछन्
पानी परे बिस्कुन भिज्ने जग्जगी
पानी नपरे बाली सुक्ने जग्जगी
माझ आकाशमा किंकर्तव्यविमुढ भएको छ
एक टुक्रा कालो बादल ।
पानी पार्न
बादल त कालै हुनुपर्छ
सेतो बादल त हेर्दा मात्रै राम्रो
माथि डाँडामाथि सल्बलाएको सेतो बादल देखेर
बेंसीमा कुनै प्रतिकृया छैन
न खेती हुने आश
न बाढी आउँने त्रास
पानी पर्न
बादल त कालै हुनुपर्छ
तर
आकाशमा कालो बादल देखेर
कुना कुनामा कालो झण्डा बोकेका मान्छेहरू
पानी परे पनि
पानी नपरे पनि
विरोधको तयारी गर्दैछन्
पानी परे बिस्कुन भिज्ने जग्जगी
पानी नपरे बाली सुक्ने जग्जगी ।
०००
गौरादह, झापा