नेपाली हास्यव्यङ्ग्य अनलाइन पत्रिका

रामशरण न्यौपाने :

सामन्ती खलको छ राज बहुतै आगो बलेको यहाँ
रेखा मालिकको र दासबिचको कोरिन्छ गाढा जहाँ
यस्तो चङ्गुलमा परेँ फजित यो चाँडो भगाऊ प्रभु
पाऊँ बस्न स्वतन्त्र शान्त बनमा भेडो बनाऊ प्रभु॥१

भेडाको दुनियाँ छ सुन्दर आहा नाचिन्छ ऊफ्रीवरी
एकै साथ बसेर घाँस र कुँडो खाइन्छ नाना थरी
चिन्ता हुन्छ न देशको न जनको निर्बुद्धि छाऊ प्रभु
पाऊँ बस्न स्वतन्त्र शान्त बनमा भेडो बनाऊ प्रभु॥२

अर्काको पनि गाँस चोर्न मनुवा मान्दैन लाजै रती
पोस्छन् मानिसले लुटेर परको आफन्त मात्रै अति
यस्ता स्वाँठ दलालको मुख कतै हेर्नै नपाऊँ प्रभु
पाऊँ बस्न स्वतन्त्र शान्त बनमा भेडो बनाऊ प्रभु॥३

बाँचेका कति छन् यहाँ कहरमा पाएर आश्वाशन
आफू भित्र भएर चेतन ठुलो दुःखी बन्यो जीवन
उम्काऊ अब जालबाट सहजै लज्जा बचाऊ प्रभु
पाऊँ बस्न स्वतन्त्र शान्त बनमा भेडो बनाऊ प्रभु॥४

मान्छे मानवमा दरिन्न यसरी अन्याय खप्ने अति
हेर्ने मात्र लुकेर देश जनको हत्या र हिँसा खती
खप्ने शाहस छैन यो मकन हा ! बाधा फुकाऊ प्रभु
पाऊँ बस्न स्वतन्त्र शान्त बनमा भेडो बनाऊ प्रभु॥५

०००
भक्तपुर