नेपाली हास्यव्यङ्ग्य अनलाइन पत्रिका

टङ्कराज ढकाल तितेपाती :

चल्दै हुन्छ रडाको पैसाको छल खेला
जल्दै बस्छ कता को खानामा छ कुबेला
चुल्हो हुन्छ चिसो पो जूवामा कुन बेला
गाह्रो हुन्छ यहाँ खै गस्तीमा छ झमेला ।१

चर्को बोल्छ चखेवा पाखामा छ जुरेली
बाठो हुन्छ परेवा छानामा गुँड हाली
कालो काग छ का का सेतो पो छ गुँहेली
मातेको किन डाङ्ग्रे हाँको हाल्छ वनेली ।२

काटेको किन हाँगा नाङ्गो हुन्छ पखेरा
पार्दैनन् फुल राम्रा मासिन्छन् कि बचेरा
मास्दैछन् त दरिद्री भासिन्छन् र भँगेरा
बुझ्दैनन् किन आमा बेचिन्छन् किन सेरा ।३

सत्ता हुन्छ दलाली मस्तीमा रङ ल्यायो
पार्दै चाङ हरामी चोरीको सुन आयो
मुर्रा जात छ राँगो बौलाहापन छायो
धर्ती लुट्छ गुलामी दोक्लो दुष्ट जनायो ।४

दाना खान्छ पराया पोकोपार्न छ धायो
माटो बेच्छ यताको धोकोफेर्न उदायो
चोर्दै दूध बिरालो बाटो घेर्न सघायो
चोरी चाल चलायो चौतर्फी कर लायो ।५

भ्रष्टाचार छ सस्तो लादेको छ भलायो
नाफाखोर प्रसस्तै जोडेको छ मुसा यो
आँखा छन् ढिकुटीमा पारेको छ दुलो यो
बिल्लीबाठ बनायो घोप्टे पामर आयो ।६

०००