भन
न सुख शान्ति जनताले पाए माथि पुगेकाहरूनै अघाए एकत्वमा किन भयो विभाजन ? सक्दैन कि के लोकतन्त्र हुर्किन ।
तीर्थराज अधिकारी :
त्यागी सबै राजनेताहरुको
आशा भरोसा कति थे अरुको
भए यी सपना चकनाचुर किन ?
कुरा बुझेकाहरुले खुला भन ।
गए यसै खेर आदर्शका कुरा
हुँदै भएनन् ती कुनैपनि पुरा
आधार खोज्दै जनता जुटे किन?
जसलाई थाहा छ उसले छिटो भन।
उठाउने भोट धेरै खडा भए
विकासका काम कता गए-गए
जाति खलक्को बढवा मिल्यो किन ?
खुलाई मनको कुरा लौ सिधा भन ।
तनाव बढ्दै गयो जात धर्मको
हराउँदै गो भय लाज सर्मको
लुछाचुँडीमात्र सदा हुने किन ?
मान्दै नमान्ने नबुझी कन मन ।
नाताको फेरो भयो एकछत्र
आफ्नो नपर्ने त गए अनेत्र
यस्तै भए आउन सक्छ दुर्दिन
जसलाई थाह छ उसले खुला भन ।
भ्रष्टहरूको विकराल रुप
मिल्यो भने त्यो हुनजान्छ चापचुप
पुग्यो देश आज परचक्रमा किन ?
बाबु तिमीले कुरा यो बुझी भन ।
भाग-भान्छा मिल्दा हुने एकजुट
कुरा नमिल्दा हलमै कुटाकुट
सबै उनै हुन् झगडा हुने किन ?
मान्दै नमान्ने नबुझीकन मन ।
न सुख शान्ति जनताले पाए
माथि पुगेकाहरूनै अघाए
एकत्वमा किन भयो विभाजन ?
सक्दैन कि के लोकतन्त्र हुर्किन ।
बिताउ छिटो अब भोगका दिन
पर्खेर बस्न सकिदैन एकछिन
आउँछ सत्य अब फर्कि कुन दिन ?
जसलाई थाहा छ उसले खुला भन ।
०००
पोखरा-१०, हाल संयुक्त राज्य अमेरिका
‘यो कस्को हात हो ?’ बाट साभार)