नेपाली हास्यव्यङ्ग्य अनलाइन पत्रिका

भीम गौतम :

साथी छिट्टो आऊ,
तिमी यता आऊ
फुटेका कुर्कुच्चा हेर्दै
हातमा मल्हम लिएर आऊ,
थर्थराएका मुटु छोप्न
तातो रुई बनेर आऊ,
रोगीको लागि
एन्टिबायोटिक सुई,
ओखति बोकेर आऊ
साथी आऊ..
छिट्टो आऊ ।

धैर्यताको मन्त्र सिकेर
व्यथा वेदना मिचेर आऊ,
सामाजिक प्रतिष्ठामा
राष्ट्रिय स्वाभिमान बोकेर आऊ,
कसिलो कम्मर कसेर
अन्धविश्वासलाई तोडेर आऊ,
साथी तिमी यता आऊ ।

चाप्लुसी, चाटुकार छोडेर
धर्ती बनाउने सन्देशमा आऊ,
पीडितको मर्का बुझेर
न्यायको इजलासमा बोल्न आऊ,
भ्रष्टहरू समाउँदै
न्यायको फैसला केलाउन आऊ,
देश बनाउने प्रणमा
दर्बिलो छाती बोकेर आऊ,
नयाँ सङ्कल्प गमेर
सबै एकसाथ लिएर आऊ,
विजयको टिको लगाउन
साथी तिमी छिटो आऊ ।

०००
भरतपुर, चितवन